Pinalawig ang 14-day quarantine ni Ruby Rodriguez.
Itinuturing na kasing Person Under Investigation (PUI) ang 54-anyos na TV host matapos siyang magkaroon ng close contact sa kapatid na si Dr. Sally Rodriguez-Gatchalian.
Namatay si Dra. Sally, na presidente ng Philippine Pediatric Society, noong Huwebes, March 26, dahil sa coronavirus disease o COVID-19.
Isinasailalim sa masusing monitoring at istriktong quarantine ang mga PUIs pagkatapos ma-expose sa isang positibo sa COVID-19, at makitaan ng mga sintomas ng sakit.
PUIs na rin ang asawa ni Ruby na si Mark Aquino, at ang bunso nilang anak, ayon sa ulat ng 24 Oras Weekend ng GMA nitong Sabado, March 28.
ONE MORE WEEK OF QUARANTINE
Ngayong Linggo, March 29, nakatakdang magtapos ang quarantine ng pamilya ni Ruby.
Pero iniulat ng 24 Oras Weekend na pinalawig pa ito ng isa pang linggo.
Hindi naman nabanggit sa report kung nakakaramdam ng sintomas ng COVID-19 si Ruby o ang kanyang asawa at anak.
Nitong Huwebes, nag-post si Ruby sa Instagram ng madamdaming mensahe para sa kanyang kapatid, na tinatawag niyang Manang Sally.
Sa kanyang post, idinaan ng TV host sa masayang pamamaalam sa kapatid ang kanyang pagluluksa.
THE NINTH DOCTOR TO LOSE THE COVID-19 BATTLE
Si Dra. Sally ang ikasiyam na healthcare frontliner na pumanaw dahil sa virus.
Sa kasalukuyan, 12 doctors na ang namatay, ayon sa Philippine Medical Association.
Sa latest update ng Department of Health (DOH) ngayong Linggo, March 29, may kabuuang 1,418 na ang confirmed cases ng COVID-19 sa bansa.
Nasa 42 naman ang gumaling, at 71 ang namatay.