Ekstrang-pag-iingat ang ginagawa ngayon nina Pops Fernandez at Senador Ramon "Bong" Revilla Jr. sa kani-kanilang mga magulang.
Ngayong may COVID-19 pandemic at wala pang vaccine para rito, sinasabing ang mga bata at matanda ay kailangang pakaingat.
Si Pops, hindi raw pinapalabas ng bahay ang inang dating artista rin, si Dulce Lukban, 74.
Sabi ng Concert Queen, "We keep in touch, siguro mga three, four times in a day...
"Siyempre, hindi ko siya pinapalabas. Bawal po. Yung mga elders po should be staying home. It's safer.
"So pinapadalhan na lang ng food. Bawal na bawal po talaga silang lumabas, and I think it's better."
Si Senator Bong, dinalaw kamakailan ang amang si dating senador Ramon Revilla Sr. sa bahay nito sa Imus, Cavite.
Pero hindi raw sila lumalapit dito, at nasa labas lang sila ng bahay, dahil ingat na ingat sila para sa kalusugan nito.
Kamakailan nga raw ay nilagnat ang 93-year-old niyang ama.
"Medyo nagka-fever siya, pero nakuha naman sa anti-biotics.
"Kinabahan din siya, ang feeling niya kasi baka tinamaan din siya ng Covid. Awa ng Diyos, hindi po."
Kaya nga raw pag dinadalaw nila ang ama, sinisilip na lang nila ito sa bintana ng bahay at kumakaway sila mula sa labas.