Inaresto ng National Bureau of Investigation (NBI) ang dating model-actress na si Avi Siwa dahil sa pagbebenta umano ng COVID-19 test kits online.
Ayon sa NBI, walang sapat na dokumentong hawak si Avi para magbenta ng test kits.
Ang mga dokumento ay dapat manggagaling sa Food and Drug Administration (FDA).
At ang mismong pagbebenta ng test kits online ay mahigpit na ipinagbabawal ng FDA.
Batay sa report ng ABS-CBN News, inaresto si Avi ngayong Biyernes, May 29.
Nag-aalok umano ang dating actress-model ng COVID-19 rapid test kits sa pamamagitan ng Facebook posts.
Sa report, may screenshot ng Facebook account na nakapangalan sa isang “Avi Siwa.”
Sa isang post ng account noong May 11, mababasa ang “I have access to 4 brands of rapid test kits.”
Nakadetalye rin ang apat na brands ng test kits, at ang impormasyon kung available na ang mga ito.
Pero iba pa ang account na ito sa lehitimong account ni Avi sa Facebook.
Sa lehitimong Facebook account ng dating model-actress, may post siya nitong May 15 tungkol sa test kits.
Mababasa sa bungad ng post ni Avi: “Good news – my 10,000 test kits are here!”
Hindi naman nabanggit sa ABS-CBN report kung nakarekober ang NBI ng test kits mula kay Avi nang arestuhin siya.
FDA: ONLINE SELLING OF TEST KITS IS ILLEGAL
Ayon sa FDA Advisory 2020-498, COVID-19 test kits “must be acquired through a prescription from a licensed physician from licensed hospitals or drugstores/pharmacies/botica.”
Nakasaad din dito na, “administration of the test must be performed by a doctor or a trained health professional.”
Ibig sabihin, hindi maaaring basta na lang ibenta, bilhin, at gamitin ng kahit sino ang COVID-19 test kits.
Ang paglabag ay may parusang isa hanggang sampung taong pagkakakulong, o pagmumultahin ng PHP50,000-PHP500,000, o pareho, depende sa pasya ng korte.
Bukod sa pagbebenta ng test kits, iniulat ng ABS-CBN na may kinakaharap ding estafa case si Avi.
May kinalaman ang kaso sa kabiguan daw ni Avi na mai-deliver ang libu-libong sako ng bigas sa pinagbentahan niya nito, ayon pa sa ulat.
Mariing itinanggi ni Avi ang parehong alegasyon.
Sa isang pahayag ngayong Biyernes, iginiit ni Avi na siya ay may "legitimate trading companies and can sell commodities including medical supplies."
Paliwanag niya, "We work with legitimate importers and distributors of PPEs [personal protective equipment], test kits, etc."
Nagpahayag si Avi ng kahandaang sagutin ang lahat ng akusasyon laban sa kanya.
ONCE-CONTROVERSIAL AVI
Taong 2004 nang naging host si Avi ng kauna-unahang LGBT reality show sa bansa, ang OUT! sa GMA-7.
Kasunod nito, noon ding 2004, naging model siya sa men’s magazine na FHM.
Napanood din siya sa ilang pelikula ng Viva Films.
Pero mas naging matunog ang pangalan ni Avi nang masangkot siya sa kontrobersiya nila ng singer-actress na si Vina Morales.
October 2015 nang nagkaroon ng iringan sa pagitan ng dalawa.
Nang mga panahong iyon, boyfriend ni Vina ang French businessman na si Marc Lambert.
Si Marc naman ang ama ng panganay ni Avi.
Naging masalimuot ang palitan nina Vina at Avi ng mensahe sa social media.
May pagkakataon pang nagpang-abot umano ang dalawa sa isang bar.
Nauwi pa sa demandahan ang insidenteng ito.
Pero pagsapit ng May 2017 ay naghiwalay rin sina Vina at Marc.
Sinabi noon ni Vina sa isang statement na hindi na raw umubra sa kanila ni Marc ang long-distance relationship.
(Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika)