“Yes, he’s engaged na.”
Ito ang kumpirmasyon ng GMA Corporate Communications sa PEP.ph (Philippine Entertainment Portal) tungkol kina Mark Herras, 33, at Nicole Donesa, 26.
Natanggap namin ang text message ngayong Biyernes ng hapon, June 5, ilang minuto matapos ang cryptic post ng Kapuso actor sa Instagram.
Nag-post si Mark ng black-and-white photo ng dalawang kamay na magkahawak.
Kapansin-pansin ang diamond ring na suot sa daliri ng babae.
Caption ni Mark: “Ang mahalin ka at makasama ka habang buhay… I love you itchybear [kissing emojis]”
Ginamit din ng StarStruck Season I Ultimate Male Survivor ang hashtag na #toinfinityandbeyond.
Samantala, sa message ng GMA Corp Comm, sinabi nilang magpapa-interview sina Mark at Nicole.
THE CONFIRMATION
Wala pang isang taong magkarelasyon sina Mark at Nicole.
August 20, 2019 nang kumpirmahin ni Mark ang relasyon nila ni Nicole.
Bago pa man ang kumpirmasyon, halata na ang public display of affection ng dalawa sa kani-kanilang Instagram posts.
Nagkatrabaho at nagkakilala ang dalawa sa Kapuso teleseryeng Bihag, na first major project ni Nicole bilang aktres.
Umere ang Kapuso afternoon teleserye mula April 2019 hanggang August 2019.
Si Nicole ay naging kandidata sa Binibining Pilipinas noong 2013, ngunit nabigo siyang makakuha ng titulo.
Noong 2014, sumali naman siya sa Miss World Philippines, kung saan hinirang siyang Third Princess.
Bago naging sila ni Nicole, ang huling naging girlfriend ni Mark ay ang actress-beauty queen ding si Winwyn Marquez.
Kinumpirma nina Mark at Winwyn ang kanilang paghihiwalay noong February 2019 pagkatapos ng tatlong taong relasyon.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika