Nakatikim ng lecture mula sa netizens ang aktor na si Xian Lim tungkol sa tamang paraan ng pagsusuot ng face mask.
Ito ay matapos mapakomento ang netizens sa video ng 30-year-old Kapamilya actor habang namimili sa supermarket.
Ipinost ni Xian ang video sa Instagram nitong Sabado, June 27.
Nakasuot siya ng black shirt, black cap, disposable face mask, at may dalang black body bag.
Ayon sa caption ng Love Thy Woman actor, namimili siya ng ingredients para sa susunod niyang cooking vlog.
Caption ni Xian (published as is): “Shopping for ingredients be like... [smiling face with open mouth and cold sweat emoji]
Makikita sa video na matiyagang pinagkukumpara ni Xian ang presyo ng mga bilihin.
Sa huli, pinili niyang bilhin ang pangkaraniwan at pinakamurang asin kaysa healthier version nito.
Napakalaki kasi ng kaibahan ng presyo ng dalawa.
“It's a numbers game for me. [smiling face with sunglasses]
“Real talk though...prices all the way up to the roof [face with raised eyebrow, face with monocle emojis]” ani Xian.
XIAN PULLS DOWN FACE MASK WHILE SHOPPING FOR SPICES
Kapansin-pansin sa video na habang namimili ng spices ay nakababa ang face mask ni Xian sa bandang ilong.
Ang bibig at baba lang ng aktor ang natatakpan ng mask.
May paliwanag naman si Xian sa caption kung bakit ganoon ang pagkakasuot ng kanyang face mask.
Sabi ni Xian: “Apologies for the mask ya'll...
“I was smelling my ingredients at the same time,” aniya, kasunod ang smiling face with open mouth and cold sweat emoji.
Bagamat may maagap siyang paliwanag sa caption, pinansin pa rin ng ilan sa 1.5 million Instagram followers ni Xian ang pagsusuot niya ng face mask.
Pabirong komento ng isang kaibigan, bibigyan nga raw sana niya ng “tutorial” ang aktor tungkol sa tamang paggamit ng face mask.
Sa reply ni Xian, inulit niya ang naisulat na niya sa caption.
Sinadya raw niyang ibaba ang mask sa bahagi ng kanyang ilong dahil “I was smelling the herbs and spices for my dish.”
NETIZEN WARNS XIAN AGAINST “RISK OF INHALING THE VIRUS”
Isang netizen ang kumontra sa katwiran ni Xian.
Delikado raw ang ginagawa ng aktor dahil sa “risk of inhaling the virus.”
Paliwanag ng netizen, ang mga grocery items na nakasalansan sa mga shelf sa supermarket ay “not being sanitized regularly.”
Ibig sabihin, kung dinapuan ng virus ang mga iyon sa pagkakalantad sa shelf, diretsong masisinghot ng aktor ang virus.
Sinegundahan ito ng isa pang Instagram user.
Sinaway nito si Xian sa pag-amoy sa mga pinapamili upang makaiwas sa coronavirus disease o COVID-19.
Ang isa pang netizen, nagbabala na nasawi sa COVID-19 ang isang kaanak, matapos raw makuha ang virus “from doing groceries.”
Sinabihan si Xian ng iba pa niyang Instagram followers na tiyaking natatakpan ng mask ang kanyang ilong at bibig.
Ito raw ang paraan upang maprotektahan ng aktor ang sarili laban sa virus, na ilang buwan nang nananalasa sa mundo bilang pandemic.
Hindi na sinagot ni Xian ang iba pang nagkomento sa kanyang video.
MORE THAN 36,000 COVID-19 CASES IN PH
Una nang sinabi ng Department of Health (DOH) na ang pagsusuot ng face mask ang isa sa mga pinakaepektibong paraan upang maproteksyunan ang sarili laban sa COVID-19.
Mabisang proteksiyon din ngayong may pandemic ang physical distancing at pagpapanatiling malusog ang pangangatawan.
Sa katunayan, obligadong magsuot ng face mask ang lahat kapag lumalabas ng bahay.
Ayon ito sa guidelines ng Inter-Agency Task Force (IATF) on the Management of Emerging Infectious Diseases.
As of June 29, 36,438 na ang kabuuang dinapuan ng COVID-19 sa Pilipinas, ayon sa DOH.
Halos sampung libo, o 9,956 sa bilang na ito ang gumaling, habang 1,255 na ang nasawi.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika