Aminin man o hindi ni Pangulong Rodrigo Duterte, hindi na maitatangging may personal siyang isyu sa ABS-CBN.
Sa kanyang State of the Nation Address (SONA) ngayong Lunes ng hapon, July 27, special mention ang ABS-CBN at Lopez family simula pagpatak ng ika-limang minuto ng kanyang speech.
Pahayag ng Pangulo, "I am a casualty of the Lopezes during the 2016 elections."
Dito ay tahasang tinawag ng Pangulo na "oligarchs" ang mga may-ari ng ABS-CBN, na ginagamit umano ang istasyon para makaimpluwensiya ng "public policy."
PRESIDENT BLASTS DRILON'S DEFENSE OF ABS-CBN
Nagsimula ang maiksi pero maanghang na rant ng Pangulo nang kagalitan niya si Senate Minority Leader Franklin Drilon.
Inakusahan daw ng senador na kasapi sa oligarkiya ang mismong pamilya Duterte.
Noong July 15, sinabi ni Drilon sa isang panayam na kung talagang desidido ang Pangulong buwagin ang oligarkiya, dapat daw na isulong nito ang pagsasabatas ng Anti-Dynasty Law.
Sabi ng Pangulo, "My countrymen, it is sad that while the government focuses its attention and resources to battle the coronavirus, there are those who take advantage of the preoccupied government.
"One of them is Senator Frank Drilon.
"In an interview, he arrogantly mentioned among others, 'Oligarchs need not be rich.'
"Then he linked the anti-dynasty system with oligarchy, and the topic was my daughter and son."
Hindi kaila na ang tatlong anak ng Pangulo ay nakasabak sa pulitika.
Si Atty. Sara Duterte-Carpio, o kilala bilang Inday Sara, ay mayor sa Davao City noong 2010 hanggang 2013, at nahalal muli noong 2016.
Vice-mayor naman ng lungsod ang bunsong anak ng Pangulo na si Sebastian "Baste" Duterte mula noong 2019.
Ang panganay na anak ng Pangulo, si Deputy Speaker Paolo "Pulong" Duterte, ay kongresista ng 1st District ng Davao City mula noong 2019.
"I AM A CASUALTY OF THE LOPEZES..."
Nabuwisit ang Pangulo dahil dinamay daw ni Drilon ang kanyang mga anak para lang ipagtanggol ang ABS-CBN.
Tukoy ni Duterte sa tirada sa kanya ni Drilon: "This happened after the [House] committee of [legislative] franchise, voted 70-11 to deny the grant of franchise to ABS-CBN.
"Obviously, he was defending the Lopezes, that they are not oligarchs."
Sa puntong ito, binanggit ng Pangulo na siya mismo ay biktima raw ng pagmamanipula at pakikialam ng pamilya Lopez sa larangan ng pulitika.
"Media is a powerful tool in the hands of oligarchs like the Lopezes who use their media outlets in their battles with political figures."
Diin niya, "I am a casualty of the Lopezes during the 2016 elections."
Hindi kaila na ilang beses naglabas ng galit si Duterte sa ABS-CBN—mula 2017 hanggang December 2019—hinggil sa hindi pag-ere ng network sa kanyang political ads noong 2016 elections.
May mga pagkakataong sinabi mismo ng Pangulo na sisiguraduhin niyang hindi ma-renew ang prangkisa ng ABS-CBN by 2020.
Pero mula Enero 2020 hanggang sa bago ilabas ang desisyon ng Kongreso sa renewal ng prangkisa ng ABS-CBN noong July 10, biglang nagpa-hands off ang Pangulo sa kalbaryong kinahaharap ng Kapamilya network.
Ang katuwiran niya, hawak daw ng Kongreso ang desisyon kung patuloy bang eere ang radio at television operations ng Kapamilya network.
Todo-depensa rin si Presidential Spokesperson Harry Roque na "neutral" ang Pangulo pagdating sa botohan ng mga kongresista sa kaso ng ABS-CBN.
Pero tatlong araw matapos ang "pagpatay" sa prangkisa ng network, hindi naitago ng Pangulo ang kasiyahan dahil nabuwag daw niya ang oligarkiya nang hindi kinakailangang magpatupad ng martial law.
"Kaya ko mamatay, mahulog sa eroplano. I am very happy," sabi ng Pangulo sa kanyang talumpati sa harap ng mga tropa ng sundalo sa Jolo, Sulu, noong July 13.
Sabi pa ng Pangulo sa pagkawala ng prangkisa ng broadcast giant: "Yun namang ABS-CBN, binaboy ako.
"Pero sinabi ko kapag ako ang nanalo, bubuwagin ko ang oligarchy ng Pilipinas. Ginawa ko.
"Without declaring martial law, sinira ko ang mga tao na humahawak sa ekonomiya at umiipit. At hindi nagbabayad."
AFTER ABS-CBN, PRESIDENT ISSUES WARNING TO TELCOS
Tumagal ng halos tatlong oras ang SONA ni President Duterte.
Sa larangan ng komunikasyon, ang isa pang kapansin-pansin ay ang babala ng Pangulo na sisiguraduhin daw niyang pakikinabangan ng taumbayan ang public services na may kinalaman sa "airwaves" at "lines."
Aniya, "For the remaining two years of my term, all that is good that belongs to the government—whether it be the airwaves, whether it be the lines, or whatever that is good for the people—will belong to the government, and it should be the government's the first option to utilize them. Ang sobra, sa kanila."
Pagkatapos ay special mention na kinagalitan ng Pangulo ang "half-cooked transactions" at "lousy services" ng telecommunication companies, partikular na ang Smart at Globe.
"I'll be strict, 'yang Smart pati itong Globe, ilang taon na ito? At ang sagot palagi sa akin, 'The party cannot be reached.'
"E, saan pala pumunta 'yang yawa na 'yan? E, ganun lang naman, ibigay niyo sa amin."
Nagbabala ang Pangulo na by December ay dapat nang magkaroon ng improvement ang serbisyo ng telecommunication companies at huwag nang hintayin ang "drastic steps" ng gobyerno.
"Alam mo, itong nabibigay ng public servicses, 'wag niyo naman kami ipahintay sampung taon bago kami magkamit ng services.
"I might just as well close all of you and revert to the line of telephone, at kukunin ko 'yan, i-expropriate ko sa gobyerno."
Ubos na raw ang pasensiya ng taumbayan.
"I will be the one to articulate the anger of the Filipino people. And you might not want what I intend to do with you," saad ng Pangulo.
Ang huling dalawang taon daw ni Duterte ay igugugol niya rito, sa tulong na rin daw ng Kongreso.
"The next two years will be spent improving the telecommunications of this country without you.
"I will find a way, I will talk to Congress and find a way how to do it."
Malinaw ang mensahe ng Pangulo na maisasakatuparan ang mga nais niya sa tulong ng Kongreso, kung saan marami siyang kaalyado.
Ito rin ang matagal nang sapantaha ng ilang political observers na nagsasabing ang Pangulo mismo ang kalaban ng ABS-CBN.
DRILON: "I WAS DEFENDING FREEDOM OF THE PRESS, NOT THE LOPEZES."
Samantala, pagkatapos ng SONA ay hiningan ng pahayag ng media si Senator Drilon tungkol sa patutsada sa kanya ni Pangulong Duterte.
Ayon sa ulat ng ABS-CBN News, nilinaw ng senate minority leader na ang ipinagtatanggol niya ay ang press freedom, hindi ang mga Lopez.
Pahayag ni Drilon, "I was defending freedom of the press, not the Lopezes. The closure of the ABS-CBN sent a chilling effect.
"As I said before, for democracy to thrive we need free press and to allow journalists to exercise complete freedom to do their mandate of reporting facts without fear.
"In the face of a pandemic, we need more access to info. I aired my support for renewal of franchise of ABS-CBN because undeniably the network complements other stations in providing timely and accurate reportage even in farthest locality unreachable to others, even to government.
"I was defending the 11,000 people and their families who would lose jobs amid the pandemic, not the Lopezes."
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika.