May nameke na naman ng social media account gamit ang pangalan ni Pasig City Mayor Vico Sotto.
Mismong ang 31-year-old local executive ang nag-alerto nito sa publiko sa kanyang Instagram Story nitong Miyerkules ng gabi, July 29.
Ibinahagi ng alkalde ang screenshot ng Facebook profile ng isang “Mayor Vico Sotto.”
Nakasaad sa profile na Tayabas, Quezon, ang inirehistrong lokasyon ng nagpapanggap na mayor ng Pasig.
Mayroong 13,642 followers ang nabanggit na fake account.
Sa caption ng totoong Mayor Vico, naroon ang pagpapaalala ng alkalde sa publiko laban sa mga namemeke ng social media accounts.
Una, binigyang-diin ng alkalde na dapat mag-ingat ang lahat sa “fake account at scam."
Isa raw halimbawa nito ang "Mayor Vico Sotto" sa Facebook.
“Kung di sigurado, ituring na peke,” payo pa ng pinakabata sa Metro Manila mayors.
MAYOR VICO: REPORT FAKE ACCOUNTS
Pangalawa, i-report sa Facebook ang mga fake account, sabi ni Mayor Vico.
Dini-delete ng Facebook ang mga reported accounts na napapatunayan nitong peke.
Karaniwang pinepeke ang social media account ng mga kilalang personalidad para makapanloko, makahakot ng followers para sa monetization ng account, o mangolekta ng pera o donasyon mula sa fans.
Pangatlo, pinayuhan ni Mayor Vico ang kanyang 963,000 Instagram followers na alertuhin ang mga kakilalang nagpa-follow sa mga account na pinepeke at pinalalabas na pagmamay-ari ng mga kilalang personalidad.
May halong biro ang paliwanag dito ng alkalde: “Wag niyong hayaan na sila naman ang mahingan ng load!”
Ang tinutukoy ng alkalde ay isang scam kung saan papaniwalain ang biktima na nanalo ito sa isang kunwaring promo, pero makukubra lang ang premyo kung magbibigay ng load sa suspek.
MAYOR VICO’S TWITTER POSERS
Mistulang paborito ng mga namemeke ng social media accounts ang popular na city mayor.
Noong Marso 30, ibinunyag ni Mayor Vico na may apat siyang poser sa Twitter.
Reklamo ng alkalde, magdudulot ng kalituhan sa kanyang constituents sa Pasig kung maraming Twitter accounts na nakapangalan sa kanya.
Sa Twitter kasi aktibong nagbibigay ng updates at announcements si Mayor Vico tungkol sa mga programa ng city government ngayong may COVID-19 pandemic.
Paalala noon ni Mayor Vico, pawang verified—o may blue check mark—ang accounts niya sa Facebook, Instagram, at Twitter.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika