Nalungkot ang ilang celebrities sa pansamantalang pamamahinga ng “Auntie Julie” character ng TikTok sensation na si Mark Averilla, o Macoy Dubs.
Para kina Frankie Pangilinan, Agot Isidro, at Bianca Gonzalez, kakaunti na nga lang ang libangan ngayong may pandemic, naipagkait pa ito sa netizens.
August 15, 2020 nang ipinakilala ni Macoy, 27, sa Twitter community si Auntie Julie bilang progresibong “online tita.”
Taglay ang kultura ng Catholic-school education, may mga pasimpleng banat sa social issues si Auntie Julie, na laging nakakaaliw at witty ang mga dialogue.
Bagamat ilang araw pa lang napapanood sa Twitter ang videos ni Macoy bilang Auntie Julie, may following na kaagad ito.
Kaya naman nagulat ang Twitter users nang inanunsiyo ng Auntie Julie content creator, nitong Biyernes, August 21, na magpapahinga muna si Auntie Julie.
CANCELLING AUNTIE JULIE
Marami ang nabigla sa desisyon ni Macoy. Ilang minuto pa lang kasi ang nakalilipas mula nang nag-upload siya ng bagong Auntie Julie video.
Sa TikTok video, nag-order ng Americano grande si Auntie Julie para sa kanyang sarili at Mocha frappe naman para sa pamangking si Cassandra.
Bilin ni Auntie Julie sa barista tungkol sa Mocha frappe: “Make sure it's not fake, huh?”
Sa sumunod na tweet ni Macoy, sinabi nitong ang “recent upload might be the last aunt Julie (series).”
Nakakalungkot daw dahil ang gusto lang naman niya ay “to create videos for entertainment, but just like the dubs I did before, ppl will still hate you.”
Pagtatapat ni Macoy, tulad ng nangyari sa kanyang dubbed videos noong April 2019, “cancelled” din ng netizens si Auntie Julie.
Ang millennial term na “cancelled” o “cancelledt” ay nangangahulugan ng pagboykot.
Kina-cancel o binabawi ng netizens ang kanilang suporta sa personalidad, grupo, o kumpanya na may "objectionable behaviour or opinion," ayon sa merriam-webster.com.
"Cancel culture" ang tawag dito sa social media, na pinasimulan sa Twitter.
Sinabi ni Macoy na ang mga nag-cancel daw sa kanya noong nakaraang taon ang umayaw din ngayon kay Auntie Julie.
Hindi nagdetalye si Macoy kung may partikular na personalidad o grupo siyang tinutukoy na dalawang beses nang nag-cancel sa kanya.
Madalas ay kinukuyog at kinakansela ng mga pro-Duterte individuals, groups, bashers, at trolls ang mga liberal mag-isip at mga may nakikitang kamalian sa gobyerno.
Ibinunyag ng TikTok sensation na dahil sa nangyari, dumanas siya ng depression.
MACOY DUBS STAYS WHILE AUNTIE JULIE RESTS
Sa kabila ng nangyari, tiniyak ng social-media influencer na gagawa pa rin siya ng dubbed videos bilang Macoy Dubs.
Nagpasalamat din siya sa lahat ng tumangkilik kay Auntie Julie.
Sa isa pang video na ipinost ni Macoy, isang bagay ang tiniyak niya: “Auntie Julie will be back.”
Sa video, isa-isang inalis ng content creator ang suot na pearl fashion accessories, na bahagi ng character ni Auntie Julie.
Habang ginagawa ito, sabi ni Macoy: “They don’t want Aunt Julie anymore.”
Himutok pa niya, “You know I’m just here to create content, di ba? Ang dami nang problema ng Earth, why do you, guys, want to cancel good vibes?
“I don’t get you, people.”
FRANKIE: “WHY COULDN’T U JUST LET US BE HAPPY?”
Ni-retweet ni Frankie Pangilinan ang video na ito ni Macoy.
Kinuwestiyon ni Frankie, 19, kung bakit kailangang i-cancel ang nagbibigay ng “little real joy” sa Twitter users.
Tweet ni Frankie: “let people make what they want to make and like what they want to like there’s so little real joy left for everyone wtf is wrong w y’all.”
Sa isa pang tweet, binalikan ni Frankie ang mga responsable “for hurting aunt Julie.”
Tanong niya sa mga ito: “why couldn’t u just let us be happy?”
AGOT: “LIGHTEN UP, PEOPLE!”
Ganito rin ang punto ng singer-actress na si Agot Isidro, 54.
Ayon kay Agot, malaking bagay ang anuman “that can lighten the load these days at ika-cancel niyo pa yun?”
May mensahe si Agot sa mga nag-cancel kay Auntie Julie: “Lighten up, people!”
Nagpasalamat naman si Macoy kina Frankie at Agot.
Noong Sabado, August 22, nag-tweet din ang TV host-vlogger na si Bianca Gonzales, 37.
Sinabi ni Bianca na nalulungkot siya na naba-bash si Auntie Julie.
Ang gusto lang naman daw ni Auntie Julie ay “mapangiti at mapasaya ang kapwa tita at mga pamangkin niya.”
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika