Nagpaliwanag si Andrea Torres, 30, kung bakit hindi siya nagbibigay ng second chances pagdating sa pag-ibig.
Siya raw kasi ang tipo ng babaeng kapag pinasok ang isang relasyon, hindi niya ito basta-basta susukuan.
Kaya naman kapag nakipaghiwalay siya, nangangahulugan daw itong ginawa na niya ang lahat para sa relasyon.
Saad ni Andrea, “I’m always 100 percent invested in my relationships. I will fight for it with all I have because I don’t like having ‘what ifs’ in life.
“If that happens, if we end up parting ways, I know I already did everything.”
Ano ba ang mga katangian ng isang lalaki para mahulog ang loob ni Andrea?
“Sincerity and consistency,” sagot ng aktres.
Nagsalita si Andrea tungkol sa pag-ibig sa panayam sa kanya ng entertainment columnist na si Dolly Anne Carvajal ng Inquirer.net, noong March 6.
Kung pagbabasehan ang mga recent post ni Andrea sa Instagram, kitang-kita na ginugugol niya ngayon ang oras para sa sarili.
Panay ang workout niya at kapansin-pansing proud siya sa kanyang seksing pangangatawan.
Pagkakaabalahan din ni Andrea ang upcoming Kapuso prime-time series na Legal Wives, kasama sina Dennis Trillo, Bianca Umali, at Alice Dixson.
LESSONS LEARNED FROM HER RECENT RELATIONSHIP
Sa ngayon, hindi pa raw handang magmahal muli si Andrea.
Pinagtutuunan daw niya ngayon ang sarili, at titiyaking handa na siya kapag nakipagrelasyon uli.
Huling nakarelasyon ng Kapuso actres ang aktor na si Derek Ramsay.
Apat na buwan na rin ang nakalilipas mula nang mag-break sila ni Derek noong November 2020 pagkatapos ng isang taong relasyon.
Pagdating sa lagay ng kanyang puso ngayon, matipid sa pahayag si Andrea.
Pero sa kanyang mga sagot, mahihinuhang marami at malalim ang mga aral na natutunan niya sa paghihiwalay nila ni Derek.
Nausisa si Andrea kung ano ang maipapayo niya sa mga babaeng nagmu-move on pagkatapos ng isang breakup.
“Reflect on what happened, get the lesson and allow yourself to grow,” sagot ng aktres.
Naniniwala raw si Andrea na ang lahat ng nangyayari ay may dahilan.
“My faith assures me that everything is going according to God’s plan, and that it is for my own good.”
Kadalasan daw, ipinagdarasal natin ang mga bagay na gusto natin, pero huwag daw kalimutang idasal na mangyari ang kaloob ng Diyos.
“Allow Him to guide you and everything else will follow," sabi ni Andrea.
Kaya raw masakit ang breakup ay dahil nagmahal ka, kaya naman dapat ay mahalin din ang sarili.
“Do things that make you happy, feed your soul, take care of yourself so that the next time you fall in love, you will have so much more to give.”
Kailan siya mas masaya: kapag single ba o kapag nasa isang relasyon?
Sagot ng aktres, “I try to be the best version of myself so that when a relationship comes along, I’m sure that I’m ready and I’m whole. My partner deserves that.
“Either way, I’m happy. I want to stay on the positive side always so I attract more positive things my way.”
DEREK ON BREAKUP WITH ANDREA
Base sa pahayag ni Derek sa panayam sa kanya ni Pops Fernandez na ipinost noong March 3, wala silang closure ni Andrea.
Tungkol sa paghihiwalay nila ni Andrea, inilarawan ito ng aktor na “very sudden."
Dagdag pa niya, "It came out of nowhere."
Mutual decision daw ang paghihiwalay nila ni Andrea.
Nagbahagi rin si Derek ng ilang detalye kung bakit nauwi sa hiwalayan ang kanilang relasyon.
“It was the both of us. We ran across a little problem," sabi niya.
“And suddenly, it became much bigger.
“And I guess we both realized that it was something na both of us could not make certain adjustments to.
“We decided, instead of forcing it, let’s just go separate ways.”
Nang matanong tungkol sa closure, sabi ni Derek: “Closure, I think that will come with time.”
Kung single pa rin si Andrea ngayon, masaya naman si Derek sa piling ng bagong girlfriend na si Ellen Adarna.