May espesyal na ugnayan bang namamagitan kina Maris Racal at Rico Blanco?
Ito ang palaisipan sa netizens matapos mag-post ni Maris ng sweet birthday greeting para kay Rico ngayong Miyerkules ng umaga, March 17.
Sa Instagram post ni Maris, makikita ang solo picture ni Rico. At kapag nag-swipe left ay lalabas ang video ng duet nilang dalawa habang nakaupo sa tabi ng isa't isa.
Kinanta nila ang sikat na love song na "Brighter Than Sunshine" ng Aqualung.
Kapansin-pansing malagkit ang tinginan at matamis ang ngiti nina Rico at Maris sa isa't isa.
Tinapos nila ang chorus ng kantang may lyrics na:
"What a feeling in my soul / Love burns brighter than sunshine / Brighter than sunshine
"Let the rain fall, I don't care / I'm yours, and suddenly you're mine
"Suddenly, you're mine / And it's brighter than sunshine."
Sa pagtatapos ng kanilang kanta, kapansin-pansing unti-unting inilapit ni Maris ang kanyang mukha kay Rico.
Pero umatras si Maris at saka napapangiting nag-fist bump na lang sila ni Rico.
Simpleng caption ni Maris kalakip ng cowboy smiley: "hi rico. happy birthday."
Makalipas ang ilang oras, nag-reply si Rico sa comments section.
Ang sweet reply ni Rico: "hahaha love you!!!"
TEASING REMARKS FROM CELEBS
Bago pa nag-reply si Rico ay nag-comment na ang ilang malapit na artista kay Maris.
Kabilang na si Alex Gonzaga na nakasama ni Maris sa PBB: All-In noong 2014.
Sabi ni Alex, "Ay iba." May kalakip itong lovestruck at clapping emojis.
Si Maja Salvador ay nag-iwan ng heart emoji sa comments section.
Tila nagulat naman si Julie Anne San Jose na nagkomento ng "Omg [heart emoji] @ricoblanco100 happy birthday!!!"
Biro naman ng direktor na si Antoinette "Tonet" Jadaone, akala raw niya ay may kiss na sa parte ng video nang lumapit ang mukha ni Maris kay Rico.
Nanunuksong sabi ni Direk Tonet, "Akala ko may kiss sa dulo ihhhhhhh."
Nanunukso ring komento ni Alora Sasam, "Ayeeee."
Sabi naman ni Markus Paterson kay Maris, "you go beh."
KILIG REACTIONS OF NETIZENS
Pati mga netizens ay kinilig din sa duet nina Rico at Maris ng "Brighter Than Sunshine."
May mga diretsong nagtanong kung magkarelasyon na raw ba sina Rico at Maris.
May mga nagsabi pang mukhang "jowa reveal" ang ginawang pag-post ni Maris ng sweet duet nila ni Rico.
Kinilig din ang netizens na nakabasa ng "love you" message ni Rico kay Maris.
Hirit ng isang netizen, "ayon na nga."
Sabi pa ng ibang netizens, kung sakali ay walang masama kung maging sina Rico at Maris sa kabila ng kanilang 25-year age gap.
Punto ng isang netizen, "love has no boundaries.
Sabi pa ng isang netizen, "OMG [heart and fire emojis] f*k age gap. Stay in love."
HOW RICO AND MARIS BECAME CLOSE
Si Rico, 48, ay kilalang singer, songwriter, at record producer.
Bilang solo artist, ilan sa sikat niyang kanta ay "Your Universe," "Yugto," at "Wag Mong Aminin."
Dati rin siyang bahagi ng OPM band na Rivermaya, na sumikat sa mga kantang "Hinahanap-Hanap Kita, "214," at "Umaaraw, Umuulan."
Si Maris, 23, ay isang singer-actress na nadiskubre nang sumali siya sa ABS-CBN reality franchise show na Pinoy Big Brother: All-In noong 2014.
Naging malapit sina Rico at Maris nang mag-collaborate sila sa kantang "Abot Langit" noong 2019.
Ayon kay Rico, pinagtulungan nilang i-compose ni Maris ang kanta na kanyang inareglo.
Tinawag noon ni Rico na "gorgeous pop nugget" si Maris, na bukas sa pagsasabing idolo niya si Rico.
Hindi inaasahan ang kanilang collaboration noon, base sa ulat ng Philippine Daily Inquirer noong May 2019.
Ikinuwento ni Maris na nag-tweet lang siya kung sino ang gustong maki-collab sa kanya sa isang kanta.
Isang fan ang nag-tag kay Rico sa tweet ni Maris, at doon daw nag-reply si Rico.