Pumanaw ngayong Huwebes, March 18, si Jan Catherine Sy, ang apo ng SM Group founder na si Henry Sy Sr. at anak ni SM Prime Holdings Chairman Henry “Big Boy” Sy Jr.
Sepsis ang ikinamatay ng 29-year-old equestrienne-singer-artist na si Jan.
Si Jan ang vice chairperson ng SM Development Corp. (SMDC), ang real estate development arm ng SM Prime Holdings.
Ayon sa pahayag ng pamilya Sy sa malalapit nilang kaanak at kaibigan, pumanaw si Jan bandang 6:35 ng gabi ngayong Huwebes.
Nitong March 14, nag-tweet pa si DJ Tony Toni sa paghahanap ng blood donor para kay Jan.
Sa tweet, sinabi ng DJ na naka-confine si Jan sa St. Luke’s Medical Center-Global City sa Taguig dahil sa septic shock.
A MULTIHYPHENATE
Sa interview ng Inquirer.net kay Jan, na inilathala noong February 8, 2021, nakasaad na taong 2013 nang nagtapos si Jan ng Business and Economics sa Westmount College sa Santa Barbara, California.
Pagkatapos magkolehiyo, tinutukan naman ni Jan ang pagsasanay sa France para maging isang equestrienne.
Kasunod nito, tuluy-tuloy si Jan sa pagsali sa mga international competition, kasabay ng mga responsibilidad niya sa SMDC.
Noong 2019, kasama ang mga kaibigan ay binuo ni Jan ang The Good Guys para sa serye ng programang Protect Our Community, na tumitiyak sa kahandaan ng mga komunidad laban sa krimen at kalamidad.
Isa ring painter si Jan.
Siya rin ang isa sa tatlong vocalists ng bandang WeekDaze.
Ang lolo niyang business tycoon-philanthropist na si Henry Sy Sr. ay sumakabilang-buhay noong January 19, 2019, sa edad na 94.