Pumanaw na ang convicted rapist and murderer na si former Calauan, Laguna Mayor Antonio Sanchez, ayon sa Bureau of Corrections (BuCor) nitong Sabado, March 27, 2021.
Idineklarang dead on arrival si Sanchez nang dalhin ito sa National Bilibid Prison Hospital bandang ika-8:30 ng umaga.
Nakatakdang isailalim sa autopsiya ang mga labi ng dating alkalde, ayon sa BuCor.
September 2020 nang kumpirmahin ng BuCor ang paglilipat kay Sanchez sa Jose R. Reyes Memorial Medical Center (JRRMMC) dahil umano sa lumalalang kalagayan ng kanyang kalusugan.
Ang dating alkalde ay may pulmonary tuberculosis, stage V chronic kidney disease, at multiple electrolyte imbalance.
September din nang magpositibo siya sa COVID-19 sa pamamagitan ng rapid test.
Pero naka-recover ito mula sa virus.
Si Sanchez ay nahatulan ng pitong termino ng reclusion perpetua o 40 taong pagkakabilanggo dahil sa kasong rape at pagpatay kay Eileen Sarmenta at pagpaslang sa kasintahan nitong si Allan Gomez noong 1993.
Sina Sarmenta at Gomez ay mga estudyante ng University of the Philippines-Los Baños.