Isa sa dalawang fresh graduates mula sa Philippine Science High School (PSHS) ang ipinagpaliban ang pagkakataong makapag-aral sa ibang bansa dahil sa financial problem.
Ito ang napagdesisyunan ni Dominic “Mico” R. Navarro na kasama sa Batch 2021 graduates ng PSHS Ilocos Region Campus.
Kamakailan, pinag-usapan sa social media ang dalawang Pisay (tawag sa PSHS students) na sina Dominic at Maria Charisma P. Estrella ng PSHS Calabarzon Region Campus.
Nabigyan kasi silang dalawa ng admission offers mula sa mga prestihiyosong unibersidad sa ibang bansa.
Sa kaso ni Mico, isang unibersidad sa Germany at dalawa sa U.S.A. ang nagbigay sa kanya ng admission offers.
Una, sa Jacobs University (Germany) with Provost Scholarship, para sa kursong BS Actuarial Science.
Sa US naman, may alok from Bentley University with provost scholarship para sa kursong BS Actuarial Science, at University of Wisconsin-Madison with direct admission to Wisconsin School of Business para sa program nito sa BBA Actuarial Science.
Ang University of Wisconsin-Madison (UWM) ang paaralang pinaboran ni Dominic.
Pero lumampas na ang pagkakataon ni Mico, 18, at taga-San Ildefonso, Ilocos Sur.
Nabigo kasi si Mico na kumpirmahin ang kanyang slot sa naturang unibersidad dahil sa isyung pinansiyal, ulat ng inquirer.net kahapon, May 27, 2021.
Para ma-secure ang spot, kinailangan kasi niyang makapag-deposit ng tinatayang PHP2.6 million ($55,000) na siyang “cost of attendance” sa UWM noon pang Mayo 1.
Hindi kasi kayang tustusan ng pamilya ni Mico ang ganoon kalaking halaga.
Ayon sa interview ng inquirer.net, “We tried to reach out to some government officials and agencies for scholarship grants, as well as with private companies [for tie-ups] but I was turned down,”
Nakasaad naman sa ipinadalang acceptance letter ng UWM kay Mico na inalok ng university ang binata dahil sa pagpapamalas niya ng “commitment to academic excellence while contributing to their schools and communities.”
Ani Mico, nanghihinayang siya sa pinalampas na pagkakataong naibigay sa kanya at sa iba pang estudyanteng kagaya niya dahil sa problemang pinansiyal.
Shelved muna ang kanyang plano na makapag-aral sa ibang bansa, at balak niya munang i-pursue ang mathematic o actuarial science degree sa mga kilalang unibersidad sa bansa.
Nasa goal pa rin niya ang mag-aral sa ibang bansa in the near future sa sarili niyang sikap.