Bumaha ng pagbati kay Serena Dalrymple, 30, matapos mag-post ng dating child star sa Instagram ng kissing photo nila ng kanyang foreign boyfriend na si Thomas Bredillet.
Bukod sa kanilang lip-to-lip kiss, kapansin-pansin din ang suot ni Serena na malaking diamond ring sa kanyang kaliwang kamay.
Matipid na caption ni Serena: “Happy anniversary! I love you forever [heart emoji]”
Ang check-in ng post ng dating child actress ay sa Chatham, Massachusetts.
Hindi direktang binanggit ni Serena kung engaged na siya, pero binati siya ng ilang netizens na nagkomento, maging ang mga artistang sina Camille Prats at Pauleen Luna.
Sa Amerika na nakabase si Serena. Huli siyang umuwi sa Pilipinas noong April 2018.
Sumikat si Serena bilang child actress noong mid-‘90s sa bakuran ng ABS-CBN.
Ilan sa mga pelikulang ginawa niya ay ang Haba-baba-doo, Puti-puti-poo; 'Tong Tatlong Tatay Kong Pakitong-kitong; Tik Tak Toys My Kolokotoys; Bata, bata.. Paano Ka Ginawa?; Ang Tanging Ina; at Wansapantaym The Movie.
Ang huli niyang ginawang pelikula ay Ang Tanging Ina Mo (Last na 'To!) kasama si Ai-Ai delas Alas noong 2010.
Nag-lay low sa showbiz si Serena at tinutukan ang kanyang pag-aaral.
Nagtapos siya ng Bachelor of Arts degree in Business Administration mula sa De La Salle-College of St. Benilde noong 2011.
Natapos naman niya ang kanyang post-graduate studies in International Business sa Hult International Business School sa London.