Mapapasabak sa kakaibang laban ang reigning two-time global mixed-martial arts (MMA) welterweight champion na si John Adajar, 30.
Siya kasi ang napiling kinatawan ng Pilipinas sa upcoming Mister Supranational 2021 male pageant na gaganapin sa Malopolska, Poland sa August 22, 2021.
Mga nagaguwapuhang binata mula sa iba’t ibang bahagi ng mundo ang magiging katunggali ng MMA fighter.
Sa loob ng ring, binansagan si John na "The Outlaw."
Kilala siya bilang isa sa mga top contenders sa Universal Reality Combat Championship o URCC, na itinuturing na “one of the country's most prestigious mixed martial arts fight leagues.”
Si John ay tubong San Pablo, Laguna, at isang Political Science graduate mula sa University of Makati.
HOW JOHN ADAJAR WAS CHOSEN
Noong July 26, 2021, itinalaga ni Miss World Philippines Organization National Director Arnold Vegafria si John bilang Mister Supranational Philippines 2021.
Ani Vegafria, naghahanap siya ng kandidatong ang mga katangian ay “athletic, sporty, good looking, [with] good moral character, pleasing personality and intelligent who can represent the country in the international stage.”
Bilang talent manager din si Arnold, kilala niya si John, na pinasok din ang pagiging ramp model.
Lahad ni John sa press conference, “I was totally shocked because Boss told me end of June.
“They told me that I’m going to compete for the Mister Supranational [2021]."
Ilang linggo na lamang ang nalalabi bago sumabak sa laban si John.
Pero bilang isang experienced athlete, nakakondisyon na raw siya sa kakaibang labang ito.
“What I learned [Mister] Supranational is [it’s] more on the sport, and I’m into sport.
“I’m in the sport industry, I’m athletic, physically fit.
“When it comes to mind games, I excel in it.”
Hindi rin daw isyu sa kanya na ibilad ang kanyang katawan pagdating sa pageant.
“Whenever I fight, I always wear trunks,” nakangiti niyang sagot.
Dahil hindi pa nananalo ang Pilipinas sa Mister Supranational, aminado si John na may pressure.
“The pressure is high and it’s very challenging.”
Malaking tulong daw na bilang MMA fighter, sanay siya sa laban.
“And I always love challenges. I will never compete without challenges.
“The pressure is very high. If ever I’m gonna take the title for the first time, it will be pride for the Philippines.”
JOHN ADAJAR'S PAGEANT EXPERIENCES
Sa presscon, ibinunyag ni John na hindi pala ito ang unang sabak niya sa male pageants.
Ang akala nga raw niya ay graduate na siya sa pagsali sa mga ito. Pero nang dumating ang pagkakataon, hindi na niya ito pinalampas.
“I thought I’m done with it. But you can never say no once you have the opportunity.
“And it’s an honor to represent the country again,” nakangiti niyang sabi.
Inusisa siya ng mga reporters kung ano ang mga sinalihan niyang pageants dati.
Nagsimula raw ang kanyang pageant journey bilang isang teenager nang sumali siya sa pageant sa pista sa San Pablo, Laguna noong 2007.
“And then I competed in Ginoong Laguna in 2014,” at nanalo siya rito.
Naging kinatawan siya ng Laguna sa Misters of Filipinas noong 2015, pero umabot lamang siya sa semi-finals.
Pagkatapos nito, iniwan na ni John ang male pageants at pinasok niya ang MMA sport noong 2016.
Ang ilan sa kanyang pinakahuling laban ay noong September 2018, nang itanghal siyang URCC Global Welterweight World Champion.
Noong April 2019 nadepensahan niya ang titulo sa labang URCC Global: Raw Fury.
