Sinakyan ni Karen Davila ang pagba-viral ng kanyang video clip kasama ang young singer na si Lyca Gairanod.
Noong Sabado, August 14, itinampok si Lyca sa YouTube vlog ni Karen.
Sa 25-minute video na ito, agaw-eksena ang ilang segundong clip na nagpapakita sa gulat na reaksiyon ng ABS-CBN News anchor at hindi maipintang mukha ni Lyca.
Tinawag na “eksaherada” ang reaction ni Karen matapos niyang malaman na parehong November 21 ang birthday nila ni Lyca.
Napa-“Oh my God!” pa si Karen matapos sabihin ni Lyca ang kanyang birthday.
Sabi ni Karen, "Liar! Birthday ko yun.
"Hindi ko alam yun. Magka-birthday kami, Scorpio! That means magkaugali tayo. We're meant to meet!
“How many people ang makakatsamba mo, ini-interview ka, ka-birthday mo?"
Panunukso pa ni Lyca, si Karen na ang sasagot sa handaan nila.
Sabi naman ni Karen, "Dear, set in stone! Pag mag-birthday tayong dalawa, ako magpapa-party.”
GUILTY!
Kaagad na nagsulputan ang kabi-kabilang memes ng video na ito sa social media. Trending topic din si Karen sa social media.
Hindi naman ikina-offend ni Karen ang memes tungkol sa eksaheradang reaksiyon niya.
Sa katunayan, ni-repost pa niya kahapon ang isang meme na may ganitong caption: “WE ALL HAVE THAT ONE FRIEND NA PARANG NAKALUNOK NG KALAHATING KILONG VITAMINS SA TAAS NG ENERGY.”
Aminado si Karen na talagang mataas ang kanyang energy.
Caption niya: “MONDAY #StressReliever Of all the memes I saw today… guilty ako dito!
“Friends always ask me, ‘Karen, where do you get the energy?” Inaantok na lahat, hyper pa rin ako! LOL.”
Nagpasalamat din ang news anchor sa mga nanonood ng kanyang interview kay Lyca.
“It’s a feel good inspiring story and the perfect stress reliever!”
At this writing, halos 1.5 million views na ang video nina Karen at Lyca.
Sunud-sunod din ang repost ni Karen sa Instagram Story ng memes at reaksiyon ng netizens.
VICE GANDA, HENRY OMAGA DIAZ, CELEBS REACT
Pati mga artista at iba pang personalities, ginawang katuwaan ang viral meme ni Karen.
Nagkomento ng laughing faces with emojis sina Maja Salvador at Angel Locsin sa post ni Karen tungkol sa kanyang meme.
Napakomento rin ang impersonator ni Karen na si Kaladkaren.
Sabi ng comedienne-host: “Ma’am KD, tawang tawa ako!!! Eksaherada ka talaga and I LOVE IT!!!!”
Ibinisto naman si Karen ng kaibigan niyang si Garlic Garcia, dating ABS-CBN writer.
Komento ni Garlic: If people only knew THIS IS THE LEGIT YOU THIS is how you really react with all of us with matching funny hampas and yakap after.”
Sumagot si Karen at sinang-ayunan ang tungkol sa pagkakaroon niya ng mataas na energy.
Maging si Vice Ganda, na-good vibes daw sa trending video ni Karen.
Tweet ni Vice: “Bwahahahhaha!!!! Eksaheradaaaa!!!!!! Pinasaya moko @karendavila!!!!”
ABS-CBN STARS SPOOF KAREN
Lunes, August 16, ini-spoof ni Vice It’s Showtime ang ang exaggerated reaction ni Karen.
Kahit ang TV Patrol anchors na sina Henry Omaga Diaz, Bernadette Sembrano, at Noli de Castro, ginawang katuwaan ang reaksiyon ni Karen sa Kapamilya primetime news program kinagabihan.
Halatang natawa rin si Vice sa panggagaya ni Henry kay Karen dahil napa-tweet pa ang It’s Showtime host.
Tweet ni Vice ngayong umaga ng Martes: “Waaaaaahhhh!!!! Sir Henry is so cute! Kapamilya news anchors giving me good vibes 2mornings in a row. More plissssshhhhh!!!!”
