Pumanaw ang former actress na si Janet Bordon, dahil sa kanser, sa Amerika nitong September 22, Miyerkules (September 23, Huwebes, sa Pilipinas).
Noon lamang September 16 ay ipinagdiwang ni Janet ang kanyang ika-61 kaarawan.
Ang kapatid na lalake ni Janet na si Rozel Bordon ang nagkumpirma ng malungkot na balita sa pamamagitan ng kanyang Facebook post ngayong Miyerkules ng hapon, September 23, 2021.
Nakasaad dito: “Our so loving sister Janet passed around 10:07 pm today and she is now with the Lord and with our love ones.
“No more pain ‘te Net. We love you so much ‘Te Net. She battled cancer for 31-years and 9 major operations since.
“On behalf of our family, thank you for all your prayers.”
Matagal nang naninirahan si Janet sa San Francisco, California.
LAST INTERVIEW
Ang pakikipag-usap niya sa Cabinet Files noong May 30, 2020 ang huling interbyu na kanyang pinaunlakan.
Napakapositibo ng pananaw ni Janet sa buhay kaya hindi mapapansin ang kanyang matagal na pakikipaglaban sa sakit na cancer, na hindi niya binanggit nang makausap namin siya.
Sa edad na 61, napanatili ni Janet ang angking kagandahan na naging puhunan niya sa pagpasok sa showbiz at pagiging in-demand leading lady ng mga sikat na aktor bago siya nagdesisyong talikuran ang pag-arte noong 1988.
Ito ang bahagi ng artikulong lumabas dito sa PEP.ph noong nakaraang taon, na mahirap makalimutan dahil sa kanyang lubos na pasasalamat nang mabasa ang artikulo at makita ang mga larawang ipinadala niya:
Para sa mga kabataang hindi na nakikilala si Janet, isa siya sa mga aktres na may pinakamagandang mukha sa Philippine showbiz noong late ’70s hanggang '80s.
Taglay pa rin ni Janet ang kagandahan hanggang sa kasalukuyan.
Nagsimula ang acting career ni Janet noong 1977 bilang contract star ng Crown Seven Productions, ang film outfit ng movie producer na si Jesse Ejercito. Si Jesse ay kapatid ni former Philippine President Joseph Estrada.
Kontrobersiyal ang launching movie ni Janet sa Crown Seven, ang Ako Si Emma, Babae!, dahil sa kanyang male character na sumailalim sa sex-change operation para maging ganap na babae.
Si Rudy Fernandez ang leading man ni Janet sa naturang pelikula.
“Non-exclusive for five pictures ang kontrata ko noon sa Crown Seven.
"But for some reason, natagalan na ipinalabas sa mga sinehan ang launching movie ko, ang Ako si Emma, Babae!” pahayag ng aktres na binansagan noon bilang First Star of 1977.
"I truly consider myself lucky kasi hindi ako dumaan sa bit roles at lead role agad ang first movie ko.
"Ni-relaunch ulit ako ng Agrix Films sa Biyak na Manyika with Phillip Salvador as my leading man, after a year ng pagiging artista ko.
"Non-exclusive for five pictures din ang kontrata ko."
Patuloy niya, "I did 4 Na Maria, a comedy film with Charo Santos, Julie Ann Fortich, and Lorna Tolentino.
Then Star with Rudy Fernandez, Lorna Tolentino, Celia Rodriguez, at Eddie Garcia.
"Meron din akong ginawa movie sa Japan na ang title Tatak Yakuza, with Rudy F. as my leading man."
Si Janet ay naging paboritong leading lady noon nina Chiquito, Ramon Revilla Sr., Dante Varona, Rudy Fernandez, at Ace Vergel.
Ang 1988 Bong Revilla-starrer na Moises Platon ang huling pelikulang ginawa ni Janet bago siya nagpasyang manirahan nang permanente sa Amerika sa bisa ng petisyon ng kanyang ina.
“Yun ang last movie ko. Hinanap talaga ni Bong ang bahay ko para kumbinsihin na magkaroon ng guest role sa action movie na ginagawa niya.
"After Virgin People [1983], hindi na ako masyadong tumatanggap ng movies dahil napagalitan nga ako ng Papa ko nang malaman niya na may bold scene ako.”
Janet Bordon in a scene from Virgin People