Pasok na sa Top 30 ng Miss World 2021 pageant ang pambato ng Pilipinas na si Tracy Maureen Perez.
Kabilang si Tracy sa walong kandidatang nanalo sa Head-to-Head Challenge ng Miss World pageant.
Matapos ang Head-to-Head Challenge, ibinahagi ng 28-year-old Cebuana beauty queen sa isang Facebook post ang kanyang pasasalamat sa lahat ng sumusuporta sa kanyang Miss World journey.
Ang buong post nito: "We got through the final head to head challenge today, Philippines!!
"To every single one of you who really took the time and effort to vote for me, thank you so much, daghang salamat, maraming salamat po!!
"We wouldn’t have made it through the final round if you hadn’t helped me get through the first round. I am so grateful for this chance, patuloy po tayong lalaban [emoji]"
Ang Head-to-Head Challenge ay isa sa fast-track events na pipili sa mga kandidatang pasok sa quarter or semi-finals ng Miss World pageant.
Sa Head-to-Head Challenge, hinati sa 16 groups ang mga kandidata ng Miss World 2021. Sumailalim sila sa isang interview session kasama si reigning Miss World Toni-Ann Singh at si Miss World 2015 Stephanie del Valle.
Para sa unang round ng Head-to-Head Challenge, kasama ni Tracy sa Group 11 ang mga kandidata mula sa Puerto Rico, Slovenia, Macau, France, at Gibraltar.
Si Karolina Vidales mula sa Mexico ang nakalaban ni Tracy sa second round ng nasabing fast track.
Bukod kay Tracy, pasok na rin sa Top 30 ang iba pang Head-to-Head Challenge winners kabilang sina Palesa Mofele ng Botswana, Audrey Monkam ng Cameroon, Namrata Shrestha ng Nepal, Sheynnis Palacios ng Nicaragua, Bethania Borba ng Paraguay, Alejandra Conde ng Venezuela, at Olivia Yacé ng Cote D'Ivoire.
Ang iba pa pang fast-track competitions ay Beach Beauty (Swimsuit), Beauty With a Purpose, Sports Challenge, Talent, at Top Model.
Ipapasa ni Toni-Ann Singh ng Jamaica ang kanyang korona sa bagong Miss World titleholder sa grand coronation night na gaganapin sa José Miguel Agrelot Coliseum sa San Juan, Puerto Rico, sa December 16, 2021.
Si Toni-Ann ang longest reigning Miss World titleholder dahil 2019 pa siya nanalo at hindi naidaos ang pageant noong 2020 dahil sa COVID-19 pandemic.