Bago pa man mag-umpisa ang National Costume competition ng Miss Universe 2021 ay nauna nang nagpakitang-gilas ang Kapuso Primetime Queen at judge na si Marian Rivera.
Ito ay base sa ini-upload na video ng Indian actress-model at kapwa judge ni Marian na si Urvashi Rautela.
Kuha ito ilang minuto bago ang preliminary pageant Biyernes ng gabi, December 10, sa Israel (Lunes ng madaling-araw, December 11, sa Pilipinas).
Ang dance steps na itinuro ni Marian ay galing sa kanyang hit sing-and-dance song "Sabay Sabay Tayo" na ini-release noong 2009.
Pagkatapos turuan ng sayaw ay niyakap ni Marian si Urvashi.
Maririnig naman si Urvashi na nagsasabing "Again?" para ulitin nila ang sayaw.
Game naman si Marian na inulit ang dance steps hanggang sa pinatigil na sila ng tila floor director ng Miss Universe dahil mag-uumpisa na ang programa.
"MY FAVORITE ACTRESS"
Sa umpisang bahagi naman ng video, ipinakilala ni Urvashi si Marian sa kanyang 43.6 million followers sa Instagram.
Aniya, "My favorite actress from the Philippines," at saka nah-pose ang dalawa nang magkalapit ang mukha sa camera.
Kumayaw rin si Marian sa camera.
Sabi pa ni Urvashi tungkol kay Marian, "She glows, she glows like the sun, and I love her smile!"
Tinanong naman si Marian ng kumukuha ng video kung anong masasabi niya kay Urvashi.
Sagot ni Marian, "She's very friendly and I love her."
Dugtong ni Urvashi, "And I'm now friends with her."
Tinanong din si Marian ng videographer kung sino ang paborito niyang actress sa Bollywood, at tinuro nito si Urvashi.
Tugon ni Urvashi: "Same to you!"
Pagkatapos magbigay ng mensahe ni Urvashi para sa mga kandidata ay hiningan din ng mensahe si Marian.
Sabi ng 37-year-old star, "Good luck to the candidates, and we're very excited to see them."
Pagkatapos nito ay sumayaw-sayaw sina Marian at Urvashi hanggang sa may isang nagsabi na turuan ni Marian si Urvashi ng "Sabay Sabay Tayo."
Si Urvashi ay sumali sa Miss Universe bilang Miss India noong 2015—ang taon kung saan si Miss Philippines Pia Wurtzbach ang nanalo ng Miss Universe crown.
Sa December 13 (Manila time) gaganapin ang Miss Universe 2021 pageant sa Universe Arena, Port of Eilat, Israel.
Si Beatrice Luigi Gomez ang pambato ng Pilipinas, na kung papalaring manalo ay magiging fifth Pinay beauty queen na mag-uuwi ng Miss Universe crown.
Kasama ni Marian bilang parte ng selection committee sina Urvashi, Miss Universe 2016 Iris Mittenaere, model Lori Harvey, actress-host Adamari Lopez, at supermodel Adriana Lima.
Kasama naman sa finals selection committee ang American actress na si Rena Sofer, habang nasa preliminary selection committee ang American TV host na si Chelsie Kryst at si Miss Universe 1976 Rina Mor.