Pumanaw na ang aktor at singer na si Romano Vasquez lagpas alas-sais ng gabi, Linggo, January 23, 2022, sa kanilang bahay sa Cavite City.
Siya ay 51 taong gulang.
Ito ang kinumpirma ng kanyang misis na si Alma Panuelo Dila (Len-Len) sa Philippine Entertainment Portal (PEP.ph).
Si Romano, Romanito Romano Anacan Dila sa tunay na buhay, ay ipinanganak noong October 31, 1970.
Nakiusap ang pamilya ni Romano na respetuhin ang kanilang pagdadalamhati at humihingi rin sila ng dasal para sa kaluluwa ng yumaong aktor.
Bukod sa kanyang asawa, naulila rin ni Romano ang kanilang apat na anak—Angelie Kate, 22 ; Albert, 16 ; Sky, 15 ; at Raven, 8 years old.
Si Romano ay sumikat bilang isa sa mga miyembro ng That’s Entertainment, ang dating youth-oriented show ni German Moreno sa GMA-7.
Naging aktor siya sa pelikula at telebisyon at isang singer-entertainer. Naging alaga rin siya ng batikang direktor na si Maryo J. de los Reyes.
Naging open sa publiko ang mga pinagdaanan ni Romano sa kanyang personal na buhay at sa kanyang career.
Katunayan, naipalabas pa ang love story nila ni Alma sa Wagas ng GMA News TV ilang taon na ang nakakaraan.
Napasabak din siya sa pagpapaseksi sa ilang roles niya sa pelikula.
Kabilang sa mga pelikulang tinampukan niya ay Noel Juico, 16: Batang Kriminal (1991), First Time… Like A Virgin! (1992), Dark Tide (1994), Epimaco Velasco: NBI (1994), Suicide Rangers (1996), Mariano Mison: NBI (1997), The Secret Of Katrina Salazar (1997).
Ginawa rin niya ang Alipin Ng Aliw (1998), Hiram (2003), Night Job (2005), Astig (2009), Mainit (2011), Sexventure (2011), at Pikit-Mata (2012).
Kalaunan ay pinasok din niya ang pagnenegosyo. Marami rin siyang nilabasang teleserye, at iba-ibang live shows bilang isang singer, sa loob at labas ng Pilipinas.
Nakaburol ang mga labi ni Romano sa Imperial Crown Funeral Service (dating Herald Funeral Services), na matatagpuan sa Purok 6 Brgy. De Ocampo, Trece Martires City, Cavite.
Wala pang detalye kung kailan ang libing.