Sa pamamagitan ng string art, nakalikha ang teacher na si Lyndon Paguntalan, 24, ng imahe ni Andrea Brillantes.
Ipinost ng junior math teacher mula Negros Oriental ang larawan niya at ng kanyang obra sa Facebook noong February 1, 2022.
Napansin ito ni Andrea at ni-repost sa kanyang verified official Facebook account na may 17 million followers.
Caption ng Kapamilya actress: “Grabe!!! [fire and mind blown emojis] thank you so much po for this [smiley with hearts emoji]
Samantala, nakakamangha ang string art ni Lyndon dahil nahulma niya ang mukha ni Andrea gamit ang sinulid, mga pako, at plywood na pininturahan ng puti.
Ang string art ay arrangement ng sinulid na may sinusunod na pattern at ikinakabit sa points para makalikha ng image.
Sabi ni Lyndon, inabot siya ng 40 hours o halos dalawang araw para tapusin ang string art.
Laking tuwa niya nang makatanggap ng notification na ni-repost sa official FB account ni Andrea ang kanyang likha.
Mensahe ni Lyndon sa PEP.ph (Philippine Entertainment Portal) nitong Martes, February 9, 2022, “Masaya po at kinabahan ako nung makita ko yung notification at maraming nagme-mention sa akin.”
Aniya pa, kamakailan lang daw niya sinimulan ang string art.
“Sa string art kasi di siya ganun ka-common na art.
"Then yung materials na gagamitin simple lang—sinulid, pako, plywood, at white paint."
Sa kanyang February 1 post, sinabi ni Lyndon na ang string art ay “WHEN MATH MEETS ART.”
May kasama raw kasing modern technology para mapadali ang paggawa niya sa string art.
Paliwanag pa ni Lyndon, “Mas madali ito sa akin kasi computer-generated yung algorithm, e. Puwede kang gumamit ng python codes, may mga app rin or software.
“Tiyaga lang po talaga ang puhunan para makagawa ka.”
Bago pa nagsimula ang interes niya sa string art ay hilig na ni Lyndon ang sining.
Sa katunayan, gumagawa rin siya ng leaf art o mga images gamit ang dahon.
Lyndon's sample of leaf art that bears the image of an anime movie.
Sa ngayon, may mga portraits nang nakapila si Lyndon na balak niyang gawin gamit ang string art.