Hulyo 30, 2021 pa nag-streaming ang Gameboys The Movie sa KTX.
Pitong buwan na ang lumipas, hopia at expectorant pa rin ang fans sa Season 2 ng BL series ng CaiReel/EliKoy.
Kailan at saan kamo matutunghayan ang mga bagong kaganapan kina Cairo (Elijah Canlas), Gavreel (Kokoy de Santos), and friends?
“Hopefully, go na kami, wait ko lang advise ng partners namin,” sabi ni Direk Perci Intalan nang maka-chat ng PEP nitong Pebrero 28, Lunes ng gabi, via Messenger.
Sina Direk Perci at Direk Jun Lana ang executive producers ng The IdeaFirst Company, na lumikha ng unang Pinoy BL series na Gameboys, at ng pelikulang Big Night na big winner sa MMFF 2021 Gabi ng Parangal.
Ang Gameboys The Movie at sa Season 2 ng Gameboys ay international co-productions ng IdeaFirst with Japan-based companies 108JAPAN Co., Ltd, Aeon Entertainment Co., Ltd. and Hakuhodo DY music & pictures Inc.
Noong Enero 21, 2022 ipinalabas sa Japan ang Gameboys: The Movie.
LATEST ON KOKOY
Tuluy-tuloy ang mga trabaho nina Kokoy at Elijah habang waiting ng right timing ang second season ng Gameboys.
Maliban sa Pepito Manaloto: Ang Unang Kuwento, kasali na si Kokoy sa Kapuso gag show na Bubble Gang.
Bida si Kokoy sa forthcoming episode ng Magpakailanman.
Tampok si Kokoy sa pelikulang Amoral na ang payanig: “What happens when people lose their moral compass? In Jun Robles Lana’s AMORAL, the lives of four people get entangled in a web of lies and deceit, luring them all to an end where destruction is inevitable.”
May gagawin ding romcom si Kokoy na ididirek ni Direk Perci, at mag-i-streaming sa Vivamax. At may dalawa pang series na gagawin si Kokoy, na hindi puwedeng pangunahan ng IdeaFirst ang producers sa pag-a-annouce.
LATEST ON ELIJAH
Natapos ni Elijah noon pa ang pelikulang About Us But Not About Us kung saan co-star niya si Romnick Sarmenta, sa direksiyon ni Jun Lana.
Noong Disyembre ay nag-shoot si Elijah ng pelikulang Blue Room, na ipalalabas sa Cinemalaya. Idinirek ito ni Maan Asuncion-Dagnalan.
Ini-announce ni Elijah sa Facebook na katatapos lang niyang gawin ang pelikulang LiveScream sa direksiyon ni Perci Intalan, at pam-Vivamax ito.
“The things we do in this film are crazy twisted. Probably the most physically and emotionally taxing role I’ve had to externalize to life so far. Had a blast,” post ni Elijah sa FB.
May pa-abs si Elijah sa ilang litrato niya sa set ng nasabing movie.
Sabi ni Direk Perci, “Yung LiveScream ay tungkol sa isang vlogger na biglang na-kidnap. Nagising na lang siya na halos walang suot at nasa isang kulungan at wala siyang idea bakit.
“Dapat nga, December 2021 to January 2022 ang workout niya, pero nagka-movie siya tapos nagkasakit.
“So, halos three weeks lang ng workout ang nagawa ni Elijah, pero every day.”
Slasher at torture na horror ang genre ng LiveScream. Parang pelikulang Saw (2004) ng Hollywood.
May isa pang bagong project na ginagawa ngayon si Elijah, at kasado na ang tatlo pa niyang kasunod na proyekto.
PA-THIRSTY
May isa pang natapos na film project ang IdeaFirst para sa Vivamax, yung PaThirsty na tungkol sa misadventures nina Pearl (Adrianna So) at Achilles (Kych Minemoto) sa paghahanap ng pag-ibig.
Si Pearl ang ex-girlfriend ni Gavreel na naging best friend niya, at shipper ng CaiReel.
Si Achilles ay pinaasa ni Terrence (Kyle Velino) na ex ni Gavreel.
Ang direktor ng PaThirsty ay si Ivan Andrew Payawal, na nagdirek ng Gameboys.
Mag-uumpisa na ring mag-shoot si Adrianna sa isang series.