Walang pagsidlan ang saya nina Wilma Doesnt at Gerick Parin dahil matapos ang 15 taong pagsasama ay ikinasal na sila.
Naganap ang kanilang pag-iisang dibdib sa Aquila Crystal Palace Tagaytay Events Place, Huwebes ng gabi, March 24, 2022.
Read: Celebrity guests at Wilma Doesnt and Gerick Livelo Parin's wedding
Matapos ang wedding ceremonies at bago ang formal dinner, eksklusibong nakapanayam ng PEP.ph (Philippine Entertainment Portal) ang mga bagong kasal.
Kailan at saan ang honeymoon?
Kuwelang humirit si Wilma na nauna ang honeymoon bago ang wedding day nila ni Gerick.
"Kaninang umaga nag-honeymoon kami! Bago kami maghiwalay, nag-honeymoon kami sa banyo!" humalakhak na sagot ni Wilma.
"Mabilis lang, kumu-quickie lang kami dun!"
Sa Coron, Palawan sila pupunta sa Lunes, March 28, para sa kanilang official honeymoon, kasama ang apat nilang anak.
Ayon kay Wilma, "Kasi kung kaming dalawa rin lang, wala kaming gagawin kundi sasabihin namin, 'Sana isinama natin ang mga kids! Sana…'
"Laging ganun, so we’ve decided na isama namin ang mga kids."
Pagdating sa kanilang kasal, maraming unforgettable moments ang mag-asawa.
Lahad ni Wilma, "Nung kanina, nung bago ako lumabas, talagang parang feeling ko naging jelly yung legs ko.
"Parang gusto kong mahimatay, na parang yung hininga ko hinahabol. So, ganun pala yung nararamdaman ng mga ikinakasal, ano?
"Yung anxiety mo, yung tension mo, lahat, parang it’s a mixed emotion of everything. Na sa sobra kong daming emotion, parang ayaw bumagsak ng luha ko."
Sabay-baling ni Wilma kay Gerick na kaharap niya during our interview, "O, in fairness, sumunod ako sa iyo, huwag akong iiyak."
Aminadong kinabahan si Wilma sa kanyang wedding entrance.
"Feeling ko kasi matutumba talaga ako sa sobrang... yung feeling mo na nasa cloud nine ka, yung feeling mo talaga na parang, ‘Hay, baka matumba ako!’ So, dun ako kabadung-kabado," aniya.
Ayon kay Gerick, hindi rin niya maipaliwanag ang kanyang nararamdaman during the wedding, at halos hindi rin siya makalakad.
"I cannot breathe, lalo na habang nakikita ko siyang lumalapit so… nervous!"
Tinanong namin si Gerick kung saan siya mas kinabahan, sa "I do" o sa wedding vows nila ni Wilma?
Sagot niya, "Sa wedding vows, actually. Ngayon ko lang siya nagawa at natapos kasi meron palang ganun, na kailangan naming basahin.
"So, isinulat ko lang kanina, kaninang umaga lang yung vow na yun. Sabi ko naman, whatever comes to my heart comes, so iyon lang yun."
Gaano katagal niya isinulat ang kanyang wedding vow?
Ani Gerick, "Thirty minutes and then nag-break muna ako ng ten minutes, humingi ako ng break and then, ‘Meron pa ba akong thirty minutes pa?’
"And pinagbigyan naman nila ako."
Wala raw siyang scratch paper na ginamit, at diretso na niyang isinulat ang kanyang vow.
"Coming from my heart talaga," ayon pa kay Gerick.
"Ang ganda ko, di ba?" bulalas na reaksiyon naman ni Wilma sa tinuran ni Gerick.
Maging si Wilma ay sa mismong araw ng kasal bumuo ng kanyang wedding vow.
Sabi ng model-actress, "Of course, yung vows din, kasi ako, habang mine-make-up-an, wala talaga akong maisip. So, sabi ko, 'Bahala na.'
"Kung anuman ang maisulat ko dun, basta yung galing sa puso ko."
Dalawang pahina ang wedding vow ni Wilma.
"Hindi, kasi malaki akong magsulat kaya two pages," paglilinaw niya.
A "PERFECT" WEDDING DAY
Kuwento pa nina Wilma at Gerick sa PEP.ph, matagal nang nakaplano ang kasal nila sa petsang March 24, 2022 regardless kung anuman ang alert level ng bansa dahil sa COVID-19 pandemic.
Suwerte naman na Alert Level 1 na ang halos lahat ng lugar sa Pilipinas nang ikasal sina Wilma at Gerick.
"Exactly! Oo nga, sabi ko talaga, the universe conspires talaga for us," sabi ni Wilma.
"March 22 kasi is our fifteenth anniversary so nag-adjust lang kami nang konti, ng two days, para naman at least meron kaming wedding anniversary."
Sumang-ayon si Gerick sa sinabi ng misis niyang the universe conspires with them.
Aniya, "Yes, yes, yes, naramdaman ko yung sobrang happiness talaga, overload yung happiness because we fulfilled our dreams talaga. Even though we’ve been together for fifteen years na."
Sabay tingin ni Gerick kay Wilma, "And then now, officially, she’s my wife so hanggang dulo na iyon."
Kung sakaling hindi Alert Level 1 at nagkataong Alert Level 3 o 4, itutuloy pa rin daw nila ang kanilang kasal.
"Kahit kaming pamilya lang," sabi ni Wilma.
Wala raw sinuman o anumang sitwasyon ang makapipigil sa kanilang kasal.
"Sanay naman kami sa mga unos na dumating, mapa-pandemic man iyan," saad ni Gerick.
At dahil maluwag na ang quarantine protocols, maraming mga kapamilya, kamag-anak, at mga kaibigan ang nakadalo sa kasal ng dalawa.
"Mahal ako ni Papa Jesus," nakangiting wika ni Wilma.
"Mahal ako ni Lord. Pati weather, everything is perfect!"
Kabilang sa VIP guests sina Senator Bong Revilla at Cavite Governor Jonvic Remulla.
"O, di ba! At congressman yung isa," pagtukoy naman ni Wilma sa isa pang ninong na si C,ongressman Jon-jon Ferrer ng ika-anim na distrito ng Cavite.
Napakaganda rin ng Tagaytay venue ng kanilang pag-iisang dibdib.
"Ah, yes, Aquila Crystal Palace, perfect! Thank you for making my dream come true."
Ang venue ng kasal na Aquila Crystal Palace Tagaytay Events Place ay pag-aari ni Tei Endencia.
Sina Wilma at Tei ay parehong artists ng Artists Circle Talent Management Services ng talent manager na si Rams David.
ON FINDING LASTING HAPPINESS IN EACH OTHER
Kung ide-describe ni Wilma ang mister niya in one word, ano yun?
"Kalmado. Lagi siyang kalmado," sagot niya.
"Hindi siya puwedeng mataranta so lagi lang siyang… pag ako nagpa-panic na, siya yung, 'O, easy, kalma, hinga, hinga.' Kaya ang tawag ko sa kanya, Mr. Kalmado."
"My happiness" naman ang description ni Gerick sa kanyang misis.
"Because through ups and downs na tinatawag namin, siya naman yung, 'Matatapos din iyan, lilipas din iyan.'"
Hiningan din namin ang mag-asawa ng mensahe nila para sa isa't isa.
"Ang wish ko sa ‘yo," sabi ni Wilma sabay harap kay Gerick, "good health, strength, more patience, at saka more love. Alam ko namang kaya mo iyan, andito ako sa likod mo."
Magandang kalusugan din ang hiling ni Gerick para kay Wilma.
"Wala naman akong hihilingin pa kundi ang aming masaganang kalusugan... para matapos namin ang lahat ng fulfillment dito sa mundo, so good health lang talaga.
"It doesn’t matter about the things… I don’t care about the things, ang importante yung health namin, ng pamilya."
Dahil ginamit ni Gerick ang mga salitang "doesn’t matter," pakuwelang naisingit ni Wilma ang hashtag ng kanilang pag-iisang dibdib.
Hashtag "#ItDoesntmatterikawParin," sabay-turo ng model/actress/host sa kanyang non-showbiz husband.
Kahit ngayong mag-asawa na sila, tuloy pa rin ang showbiz career ni Wilma.
"Ay, itutuloy natin iyan, kailangan natin iyan," sabi ni Wilma.
Kasali si Wilma sa cast ng Kapuso prime-time series na First Yaya at sa online digital series na GV Boys.
Hindi naman malaki ang adjustment ni Gerick sa pagkakaroon ng asawang artista.
Aniya, "Lagi ko lang inilalagay sa isip ko na hindi siya artista, para mas kalmado, para walang pressure. What comes around, bahala na.
Panghuling tanong namin sa newlyweds: magdadagdag pa ba sila ng anak?
"Ay, sorry po, sarado na po ang factory! Pero ang amusement park open 24/7, we can play all the time, anytime!" tumatawang sagot ni Wilma.