Pormal nang nagdeklara ng susuportahang kandidato sa pagkapangulo ang Lunch Out Loud (LOL) host na si Billy Crawford.
Sa kanyang Instagram kagabi, March 28, 2022, nagbahagi ang singer-TV host ng isang minutong video kung saan ipinaliwanag nito kung bakit suportado niya ang kandidatura ni presidential aspirant at Manila Mayor Isko Moreno.
Pahayag ng 39-year-old singer-host, “Alam niyo po, ilang buwan na lang eleksyon na.
“And I realized how crucial this election is dahil unti-unti na tayong bumabangon sa pandemic.
“At hindi magiging madali ang trabaho ng mga officials na iboboto natin. They’ll decide how we will rise above this challenge.”
Dagdag pa ni Billy, bawat eleksyon ay may mga pangako ang mga tumatakbo sa anumang posisyon.
Para sa kanya, gusto raw niya ng pagbabago kaya ang napili nito ay ang kandidatong kayang tumupad sa pangako hindi lamang sa salita kundi maski sa gawa.
Aniya, “Marami ang nangangarap, marami ang nangangako.
“Kaya, I wanted to make my own stand in this coming election. Gusto ko ng pagbabago hindi lang sa salita, pati na rin sa gawa.
“Kailangan natin ng simpleng gobyerno para sa ikauunlad ng bawat Pilipino.
“Kailangan natin ng lider na kayang humarap sa anumang pagsubok.”
Nakikita raw niya kay Isko ang pagiging lider nito na nagpapahalaga sa iba’t ibang isyung panlipunan lalo na sa edukasyon.
Ani Billy, “Lider na kayang punan ang pangangailangan ng mga mahihirap.
“Lider na sa tingin ko nagpapahalaga sa edukasyon at lider na kailangang ipaglaban ang ating bayan.
“Kaya ako sa darating na Mayo masasabi ko, Isko ako.”
View this post on Instagram
Naka-off ang comments section ng post ni Billy kaya walang mababasang reaksiyon mula sa netizens at followers niya.
Sina Billy at Isko ay nagkasama sa defunct youth-oriented show ng GMA-7 na That's Entertainment ni German Moreno.