Wala pang boyfriend ang 19-anyos na si Christine Bermas. Wala pa raw sa hinagap niya ang magpabuntis.
“Focus muna tayo sa career. Darating din naman tayo sa point na yun, e,” sambit ni Christine nang makausap siya ng PEP.ph (Philippine Entertainment Portal) noong Marso 22, 2022, Martes, sa Wing Zone restaurant, Araneta City, Quezon City.
“For now, i-appreciate mo kung anong meron ka at ipagpatuloy mo ang ginagawa mo.”
Buntis ang papel niya sa pelikulang Sisid, na streaming umpisa Marso 25, Biyernes, sa Vivamax.
“Role lang. In real life, hindi. Hindi ko gagawin yun in real life,” saad ng baguhang sexy actress.
Wala ba siyang nararamdaman para sa mga aktor na nakaka-love scene niya?
“Wala! Wala at all. Wala akong nararamdaman. Kung meron man, as my character. Yung ginampanan kong karakter,” ani Christine.
“Pero outside that, as Christine Bermas, wala at all.”
Baka naman sa babae siya nagkakaroon ng feelings?
Natawa si Christine at nagbiro, “Puwede! Ha! Ha! Ha! Possible! Ha! Ha! Ha! Ha! Tingnan natin. Explore ko 'yan…
“Baka nga po sa babae talaga. Ita-try ko 'yan. Charot! Ha! Ha! Ha! Ha! Ha! Ha! Charot po! Hindi naman! Darating din po sa point na ganun.”
Sa mga naging leading man niya, meron bang nagparamdam o nagpalipad-hangin sa kanya?
“Wala pa naman so far. Kasi feeling ko, lahat sila… taken! Ha! Ha! Ha! Ha!” masayang paghalakhak ni Christine.
WORKING WITH AWARD-WINNING DIRECTORS
Ang unang movie ni Christine ay bilang one-of-those sa Huling Baklang Birhen sa Balat Lupa kung saan bida si Teejay Marquez, sa direksiyon ni Joel Lamangan.
More and more ang pelikula niya kay Direk Joel. Suporta si Christine sa launching film ni Cloe Baretto na Silab, bago syinuting ang launching film niyang Moonlight Butterfly na nag-streaming noong Marso 18 sa Vivamax.
Sa Abril 1, Biyernes, ay streaming na sa Vivamax ang pelikulang Island of Desire kung saan siya muli ang bida, with Direk Joel pa rin as director.
“Iba yung story nitong Island of Desire, e. As in sa lahat ng nagawa kong movies with Direk Joel, parang ito ang masasabi kong favorite ko,” sabi ni Christine.
Co-stars ni Christine sa Island of Desire sina Sean de Guzman, Jela Cuenca, Rash Flores, Massimo Scofield, Sheree, Jim Pebanco, at AJ Oteyza.
Ang una naman niyang movie sa ilalim ni Direk Brillante Mendoza ay yung The Policeman na bida sina Coco Martin at Julia Montes.
Sumunod iyong BL movie na Sisid, kung saan bida sina Paolo Gumabao at Vince Rillon.
Anu-ano ang natutunan niya sa ilalim ng mga premyadong direktor na sina Direk Brillante at Direk Joel?
“Andami! Andami kong natutunan sa kanila. Knowing na bago ka pa lang na aktres, tapos napupunta ka sa mga direktor na alam mong batikan at award-winning…” pahayag ni Christine.
“Kay Direk Joel talaga ako nag-start. Mas binuild-up niya yung kakayahan ko, and meron silang pagkakaiba ni Direk Brillante.
“Kasi, si Direk Brillante, hindi siya gumagamit ng script. Gusto niya, nakikita yung natural na akting sa mga artista niya.
“Si Direk Joel is using script, pero gusto niya na malaya mo ring naibibigay yung character sa sarili mo.
“Kailangan lang na marunong kang makinig at sumunod sa mga instructions, and para hindi kayo, like, hassle sa shoot.
“Natutunan ko sa kanilang dalawa ng act natural, be natural. Ibigay mo yung kayang ibigay ng sarili mo.
“Kasi, pag nabigay mo na yun, susunod at susunod na yung way kung paano mo dalhin ang sarili mo as an actress.”
DREAM MOVIE WITH JOSHUA GARCIA
Nakatrabaho rin ni Christine si Direk Roman Perez Jr. sa pelikulang Siklo. Inaasam ni Christine na makagawa ng rom-com sa ilalim ni Direk Cathy Garcia-Molina.
“Kung mabibigyan ng opportunity, I want to work with Direk Cathy!” bulalas pa ni Christine.
Ang pinapangarap niyang makatambal ay ang ultimate crush niyang si Joshua Garcia.
Sakaling ligawan siya ni Joshua, bibigay agad siya?
“Why not?! Ha! Ha! Ha! Ha! Ha! Charot! Charot lang… charot lang. Hindi naman siguro aabot sa ganung ligaw stage. Hi! Hi! Hi! Hi!” kilig-kiligang paghagikgik ni Christine.
Ano na ang nabago sa buhay niya mula nang mag-artista siya?
“Wala pa naman so far na nababago sa life ko,” mabining pagbuntong-hininga ni Christine.
“Andun pa rin ako sa process na ini-step-step ko pa yung mga nangyayari sa career ko, at pinag-iigihan ko pa at pinaghuhusayan.
“Ang masasabi ko siguro na change is kung paano ako tingnan ng tao. Minsan kasi, may mga judgment na nangyayari, especially sa movies na ginagawa mo.
“You’re doing sexy roles, sexy movies. So, yeah, yun ang mga changes — dyina-judge ka nila sa mga lumalabas.
“Pero yung personality ko kasi, sobrang different sa mga ginagawa kong movie.
“So, parang for me, character lang talaga yung ginagawa ko. As in like… kasi, sobrang conservative ko in real life, e.
“Hindi ko nga in-expect na papasukin ko yung pagpapa-sexy. Well, sabi ko naman… sige, we’ll try it.
“Kasi, baka ito yung chance, ito yung opportunity na ibinibigay ni God. So, why not try it?
“And so far, naging OK naman yung process ng career, at nagtutuluy-tuloy naman. Maganda naman ang takbo.”