Ikinasal na ang singer-actress na si Tippy Dos Santos sa kanyang non-showbiz boyfriend na si Miguel Raphael Porcuna.
Si Tippy ay nakilala bilang isang Star Magic talent na naging ka-love team ng actor-singer na si Sam Concepcion. Siya rin ay naging video jock ng MYX, ang music channel ng ABS-CBN.
Sa kasalukuyan, si Tippy ay isang law student habang ang kanyang boyfriend na si Miguel naman ay isang piloto.
Naganap ang kanilang Christian wedding sa Emerald Events Place, Antipolo, Rizal noong March 31, 2022.
Ibinahagi nina Tippy at Miguel sa Instagram ang ilan sa mga litrato mula sa kanilang kasal.
Saad ni Tippy sa kanyang post noong April 1 (published as is), “Call me Mrs. P. Yours, everyday in every way.”
Sa isa pang post, kung saan ipinakita niya ang kanyang wedding gown, sinabi ni Tippy na ang araw ng kanyang kasal ang “happiest day of my life.. so far.”
Si Mark Bumgarner ang nagdisenyo ng kanyang wedding gown.
Si Miguel naman ay ipinost ang mga litrato ni Tippy habang siya ay naghahanda para sa kanilang kasal.
Sabi ni Miguel sa kanyang Instagram post noong April 2 (published as is): “Super thankful and blessed because I finally married the woman of my dreams! You truly bring out the best in me and you always push me to do better.
"Our wedding day was the happiest day of my life, Tippy. I know that we are just getting started, and that there are happier days to look forward to.
"Thank you for loving me the way that you do. Everyday in every way my love! @tippydossantos8. Mrs. P haha!”
Ayon sa report ng ABS-CBN News, sina Robi Domingo at Ai dela Cruz, na dating kasamahan ni Tippy sa MYX, ang nag-host ng kanilang reception.
Dumalo rin si Sam Concepcion sa kasal ng dati niyang ka-love team.
Ipinost ng ina ni Tippy na si Happy Dos Santos ang litrato ng dalawa sa kanyang Facebook account.
Kumanta rin sina Sam at Tippy ng “Dati,” ang hit 2013 song nila na nanalo ng grand prize sa 2nd Philippine Popular Music Festival at isinulat nina Thryo Alfaro at Yumi Lacsamana.
In-upload sa Facebook ni Christian Espiritu, isa sa mga guest sa kasal, ang performance video nina Sam at Tippy ng "Dati" sa reception.
Na-engage sina Tippy at Miguel noong December 24, 2020, pagkatapos ng apat na taon ng kanilang relasyon.
Dapat ay noong January 2022 pa ikinasal sina Tippy at Miguel pero hindi ito natuloy dahil sa surge ng cases ng COVID-19 noong panahong iyon.