Naging aktibo si Miss Universe Philippines 2018 Catriona Gray sa social media habang ginaganap ang Miss Universe Philippines 2022 grand coronation kagabi.
Tinutukan ni Catriona ang event kagabi, base sa kanyang tweets.
Si Celeste Cortesi ng Pasay ang nagwagi ng korona sa pageant na ginanap sa Mall of Asia Arena, Pasay City, gabi ng Sabado, April 30, 2022.
Hindi nakadalo si Catriona sa event dahil “I was already committed to filming out of town,” post niya kagabi.
Gayunpaman, inamin ni Catriona na nag-reach out ang Miss Universe Philippines Organization sa kanya weeks before, pero hindi siya pumuwede.
Nakapunta rin si Catriona sa isang pre-coronation night gathering at nakasama ang mga former Miss Universe titleholders at current Miss Universe na si Harnaaz Sandhu na imbitado sa national pageant.
Sa gabi ng koronasyon, sunud-sunod ang tweets ni Catriona na kanyang mga komento habang ongoing ang grand coronation kagabi.
Isa sa mga agaw-pansin niyang komento ay sana raw ay mas mahirap pang tanong ang mga ibinato sa finalists sa question-and-answer round.
Tweet niya: “I wish the girls were given more difficult questions.
“Feeling ko kayang kaya nila.”
Hindi nag-iisa si Catriona sa obserbasyon niyang ito.
May ibang netizens na ganito rin ang puna.
Katulad ng isang netizen na nagkomento: “TAMA TE! YUNG QUESTIONS NILA KAYANG KAYA SAGUTIN NG 12 YEAR OLD GIRL.”
“Hoyyyy,” reply ni Catriona, na may kasamang mga laughing with tears emojis.
Bakas din sa isa pang tweet ni Catriona na may mga personal bet siya na hindi nakapasok sa Top 5, gaya nina Cebu Province at Iloilo.
Sa kabila nito, kumbinsido si Catriona na maraming kandidata ang “great speakers” sa batch na ito.
Sinagot din ng Filipino-Australian beauty queen ang netizen na nag-abang ng kanyang “special participation.”
Sagot ni Catriona: “Actually, hindi ko rin alam [embarrassed emoji]”
Bagamat hindi nakadalo si Catriona sa grand coronation, may announcement ang MUP organization na mayroon siyang “special participation.”
Bago i-announce winners, ipinalabas ang video ni Catriona about women empowerment.
Hatalang tumutok si Catriona sa programa dahil may tweet din siya sa performances ng artists sa program kagabi.
Tweet niya, “Bongaaa!! Naging concert pala ang #MissUniversePhilippines2022 sayaaa para sa live crowd.”
Sunod niyang tweet, “Looove the performances of EZ Mil and JM Bales [clapping hands emojis]”
Nang koronahan si Celeste Cortesi, nag-tweet si Catriona at binati ito.
“Congratulations Celeste! Welcome to the sisterhood [Philippine flag emojis].”
