Naging trending topic si Alden Richards, 30, nitong Huwebes ng umaga, May 5, 2022.
Isa sa mga dahilan ay ang kumalat niyang larawan kasama si Miss Universe Spain 2021 Sarah Loinaz, 23.
Ipinost ng Latina beauty queen ang selfie pic nila ni Alden sa kanyang Instagram account.
Hindi malinaw kung bakit nagkita ang dalawa pero kasama ni Sarah sa kanyang mga lakaran dito sa Pilipinas si Josh Yugen, publisher at editor ng Xpedition, isang Dubai-based magazine.
Si Alden ang naging kauna-unahang male cover ng naturang magazine noong 2019.
Binanggit ni Sarah na close friend niya ang publisher-editor nito.
Sa kabilang banda, nabanggit sa ilang reports na narito sa Pilipinas si Sarah para sa ilang pictorial shoots.
MISS UNIVERSE SPAIN ON ALDEN RICHARDS
Samantala, ngayong Huwebes ng gabi ay nagpa-“Ask me a question” session si Sarah sa kanyang followers.
Hindi pinalampas ng netizens ang pagkakataon para matanong siya ukol kay Alden.
Tanong kay Sarah: “Is Alden Richards handsome in person?”
"Yes" ang sagot ng beauty queen, pero may iba pa raw mga katangian si Alden na hinahangaan niya.
Sagot ni Sarah: “Yes but the best thing about him is he is so humble, and learned that he help many charities.”
Hiniritan pa siya ng tanong kung sino ang crush niyang Filipino celebrity.
Sagot ni Sarah: “Hahaha soo many good looking Filipinos but I only look for someone with a beautiful heart.”
Tanong naman ng isa pa, “Are you single?”
Reply ni Sarah: “I answered this in the news a lot of times and yes – I am single.
“Can someone from the Philippines introduce me to someone hahaha”
Sa isa pang Instagram Story ni Sarah ay ang video habang binabagtas nila ang EDSA at nakita niya ang larawan ni Alden sa isang billboard para sa isang online shopping service.
Caption ni Sarah: “I think I recognize this handsome guy [laughing with tears emoji]”
Samantala, mahihinuhang naging masaya si Sarah sa kanyang pamamasyal sa Pilipinas. Inisa-isa rin niya ang mga lutong Pinoy na nagustuhan niya gaya ng sinigang na hipon, kare-kare, at ang paborito niyang Chicken inasal.
May lumabas pang litrato na kasama ni Sarah ang big boss ng Viva Entertainment na si Vic del Rosario.
Hindi naman napigilang mang-intriga ng ilang fans sa mga lumabas na larawan ni Sarah kasama si Alden.
May mga nagtatanong kung susunod daw ba siya sa yapak ni Miss Universe 1993 Dayanara Torres na gumawa ng career sa Pilipinas at nakarelasyon noon ang isang Filipino celebrity, si Aga Muhlach.
Sa kabilang banda, ipinost ni Sarah na may aabangan tungkol sa kanya pero hindi na siya nagdetalye.