Hindi nangiming ikuwento ng komedyanteng si Moi Marcampo ang “nakakalokang” karanasan niya sa veteran actress na si Pilar Pilapil.
Paulit-ulit daw siyang totohanang sinampal ng beteranang aktres kahit sa rehearsal pa lang ng pinagsamahan nilang acting project noon.
Unang nakilala si Moi bilang personal assistant ni Piolo Pascual bago siya naging TV personality.
Nang mag-guest siya sa June 15, 2022 episode ng Mars Pa More, natanong si Moi tungkol sa nakakalokang celebrity encounter niya.
Inilahad ni Moi na pinrangka niya si Pilar nang sinampal siya nito nang totohanan kahit hindi pa raw take.
Kuwento ni Moi, “Kasi may taping kami, ‘tapos may eksena kami na intense yung eksena.
“Ngayon, rehearsal pa lang, kailangan niya akong sampalin. Sinampal na niya ako rehearsal pa lang.
“At ang sakit ng kamay niya. Yung totoo, ah, yung hindi eme-eme.
“Talagang namula yung dito ko,” sabay hawak ni Moi sa kanyang pisngi.
Diniretsa raw niya ang veteran actress, “Sabi ko, ‘Tita, ba’t mo naman ako sinampal? Rehearsal pa nga lang, e. Wala pang sinabi si Direk na take.’
“Sabi ko, ‘Alam mo, Tita, ang sakit.’ Sabi ko, ‘Natanggal yung mga ngipin ko.’”
Hindi raw nagustuhan ni Moi ang isinagot sa kanya ni Pilar.
“Alam mo kung ano ang sinabi? ‘Okay lang ‘yan, marami ka pa namang ngipin.’
“Bastos, e, ‘no. Bastos,” nangingiting sabi ni Moi.
Sabay kabig si Moi na mabait naman daw ang beteranang aktres.
Sundot na tanong ng host na si Camille Prats: “How did you take it?”
Sagot ni Moi, “'Tita, wala pang take. Kumalma ka naman.’ Kasi ang sakit ng kamay niya.
“Kasi ilang beses niya na akong sinampal, hindi siya yung fake, ha. Totoo.
“’Tapos pulang-pula yung dito ko, o.”
Sabi naman ni Camille, may mga pangyayari raw sa taping na kapag may ganoong eksena, hindi alam ng isang aktor kung ano ang ang iniisip ng kanyang kaeksena.