Sinabi ni Mariel Padilla, 37, na bukas siya sa posibilidad na maging co-host muli ni Willie Revillame, 61.
Gayunpaman, naniniwala si Mariel na hindi na siya kukuning co-host ni Willie sa napipintong pagbabalik-telebisyon ni Willie para sa kanyang game and public service program.
Inaasahang mapapanood muli ang Wowowin Tutok to Win ni Willie oras na i-launch ang Advanced Media Broadcasting System (AMBS) sa Setyembre 2022.
Ang AMBS ay ang broadcast network na pagmamay-ari ng pamilya ni former Senate President Manny Villar.
Related article: Willie Revillame: "AMBS will be on air by September."
Si Mariel ay matagal naging co-host ni Willie sa Kapamilya noontime show na Wowowee at nang lumipat ito sa TV5 para sa Wil Time Bigtime at Wowowillie.
Inusisa ng Philippine Entertainment Portal (PEP.ph) si Mariel kung open pa siyang maging co-host muli ni Willie kung hilingin ito ng veteran TV host.
“Number one, of course, yes. Kasi I have a very good working relationship with Kuya Willie. Very, very good…” sagot ni Mariel sa exclusive interview ng PEP.ph noong June 28.
Binalikan ni Mariel ang matagal na pinagsamahan nila ni Willie bilang magkatrabaho.
Aniya, “Inalalayan ko siya for how many years. Inalalayan because co-host ako…
“So, job iyon ng co-host na sasaluhin mo yung main host kapag kailangan.
“And for so many years, I feel na naitawid ko siya talaga, for so many years…”
Pero hindi raw nakikita ni Mariel na posibleng kunin siyang muli ni Willie.
Paliwanag niya, “Feeling ko din hindi na ako ang ia-ask ni Kuya Wil na mag-[co-host]. Ang tanda ko na...
“Si Kuya Wil, marami pa siyang maaano na mga ibang mas bata para ma-hone pa niya pa yung talento ng iba pa.
“Pero ang tanda ko na, alam mo yun? Yun ang masasabi ko.”
MARIEL IS WILLIE’S “BENCHMARK” AS CO-HOST
Samantala, naibahagi rin ni Mariel na nakarating sa kanyang puring-puri siya ni Willie bilang dating co-host.
Kuwento ni Mariel, “Alam mo, natutuwa ako and I’m so flattered because every time na may bago siyang co-host, and the staff, they always tell me, ang benchmark ni Kuya Willie ng good co-host is me.
“Always, kinukuwento sa akin, ‘Dapat para kayong si Mariel!’ ginaganun niya. ’Si Mariel, professional ‘yan pag may meeting dito, hindi nali-late.’”
Iyon naman daw ay natutunan ni Mariel kay Willie.
“Natutunan ko ‘yan lahat because of him. So, I get so flattered every time naririnig ko yung stories na sinasabi niya, pag may tini-train siya na mga bagong co-hosts.
“Sinasabi niya, dapat parang Mariel. So, thank you very much for that, Kuya. Hahaha!”
Sa kabilang banda, nasabi rin ni Mariel na matagal na siyang walang komunikasyon kay Willie. Hindi na nga raw niya maalala kung kailan sila huling nagkita.
“Baka mas nagkita pa sila ni Robin,” pagtukoy ni Mariel sa mister na si Senator Robin Padilla.
“Hindi ko siya nakita nang matagal na panahon.”
Dagdag niya, “But I’m always happy for his success. I always wish him the best of health and he knows that.”