Natawa na lamang si Cherry Pie Picache nang tanungin ni Luis Manzano kung nagselos daw ba kamakailan ang ama nitong si Edu Manzano.
Si Edu ang kasalukuyang karelasyon ni Cherry Pie.
Read: Edu Manzano, Cherry Pie Picache admit rekindled relationship after 20 years
Sa pinakabagong vlog ni Luis sa YouTube na may titulong "PIEDU LOVE STORY UPDATE (May pinagdadaanan?)," tinanong ni Luis kung nagkaselosan na ba ang dalawa.
Unang sumagot si Edu at pabirong sinabing dahil sa kanyang "charm" ay paniguradong may pinagselosan na si Cherry Pie.
Aniya, "Well, siyempre. Hindi mo rin maaalis sa akin iyon, e. Bagamat hindi ako guwapo, charming naman."
Muling inulit ni Luis ang tanong, at sa puntong ito ay si Cherry Pie naman ang sumagot.
Tanong ni Luis: "Tita Pie, si Daddy ba nagselos kamakailan?"
Bago pa man magsalita si Cherry Pie ay humagikhik ito sa tawa nang seryoso siyang titigan ni Edu na para bang may gustong sabihin at ipahiwatig.
Tumawa na lang din si Luis at misis nitong si Jessy Mendiola, na kasama rin sa vlog, nang mapansin nila ang tingin ni Edu kay Cherry Pie.
"Iyong titig, meron," sambit ni Jessy.
Dinugtungan pa ni Luis ang nauna niyang tanong kay Cherry Pie.
Ani Luis, "Si Daddy ba ang selos niya iyong kasi may selos na, kunwari, ako seloso ako pero gusto ko iyong nilalambing lang? Ganun ako, iyong kakapitan lang. Ganoon ba si Daddy?"
Dagot ni Cherry Pie, "Oo, gusto niya ng assurance. Tapos hindi magsasalita iyan, mararamdaman mo na lang."
Biro pa si Luis, "Hindi nagsasalita si Daddy? Mga three months hindi nagsasalita, ganun lang, nagkakaintindihan pa ba kayo?"
Seryoso namang paliwanag ni Edu, "Kasi minsan, pinapairal mo na lang yung iyong nararamdaman. Hindi na kailangan lagi na always in the form of words."
Sa huli ay hindi rin pinangalanan ni Cherry Pie kung sino ang tinutukoy niyang pinagselosan ni Edu.
EDU AND CHERRY PIE REKINDLED ROMANCE
Noong December 2021 ay nag-guest na rin sina Edu at Cherry Pie sa YouTube vlog ni Luis.
Dito ay inamin ni Cherry Pie na answered prayer ang kasalukuyang relasyon nila ni Edu.
Hindi raw niya akalaing magiging sila muli matapos ang dalawampung taon at sa tila pagtatagpo nilang maraming tanong kung ano nga ba ang estado nila.
Sa bagong vlog ni Luis, muli niya itong binuksan at tinanong ang dalawa kung hanggang ngayon ba ay mayroon pa ring natitirang "uncertainty" sa kanila.
Saad ni Cherry Pie, "I think we're still in the stage na siyempre bago pa, di ba, we're really getting to know each other.
"Tapos, di ba, we're starting, iba e, habang tumatagal, nagkakaalaman na talaga ng ugali.
"As much as love is so nice to enjoy, it's always a decision, lalo na sa akin, kasi long haul, hindi ba?
"Tapos dapat iyong lahat ng gap, through thick and thin, basta parang ganun. So, I think we're both... it works both ways, we're working."
Dagdag naman ni Edu, "Even now, we're still learning new things about each other."
Hindi rin pinalampas ni Luis ang pagkakataong tanungin sina Edu at Cherry Pie kung sakaling hindi sila nabigyan ng pagkakataon noong nakaraang taon na ituloy ang kanilang love story, naniniwala ba silang muli at muli silang pagtatagpuin ng tadhana?
"Without a doubt, somewhere down the road, magkikita na naman tayo," sagot ni Edu, habang nakaakbay sa kanya si Cherry Pie.
Ayon din kay Cherry Pie ipaglalaban niya ang relasyon nila ni Edu, "without a doubt."
Komento ni Luis, "Ang galing, ang itinadhana ay talagang mangyayari. Puwedeng pigilan panandalian, puwedeng pigilan pansamantala, pero kung kayo talaga ng itinakda, kayo talaga ang itinadhana sa isa't isa."