Humingi ng tulong si Vice President Sara Duterte sa National Bureau of Investigation (NBI) upang imbestigahan ang mga diumano'y insidente ng pang-aabuso na inireklamo ng grupo ng mga estudyante at alumni ng Philippine High School for the Arts (PHSA).
Sangkot umano dito ang ilang teacher o staffer ng paaralan na tinukoy ng mga nagpakilalang biktima ng pang-aabuso.
Isinalaysay ng ilang alumni ng PHSA na menor de edad sila nang malagay sila sa sitwasyon na anila'y maituturing na "sexual abuse" noong panahong nag-aaral pa sila roon.
Ang PHSA ay isang state-run boarding school sa Los Baños, Laguna.
Si Vice President Duterte ay secretary ng Department of Education (DepEd).
Bahagi ng official statement ng DepEd nitong July 12, 2022:
"Committed to protecting the welfare of all learners, the Department of Education (DepEd) has sought the immediate assistance of the National Burea of Investigation (NBI) to investigate the reports of emotional, verbal, and sexual abuse allegations in the Philippine High School for the Arts (PHSA) in Los Baños, Laguna.
"In a letter duly received by the NBI on July 11, 2022, Vice President and Secretary of Education Sara Z. Duterte has requested the investigation body to provide a comprehensive report on the issue as soon as possible.
"Likewise, the Department has also tapped its Child Protection Unit (CPU) and Child Rights in Education Desk (CREDe) to conduct a similar investigation in relation with the agency's Child Protection Policy.
"PHSA has also informed the Department that they are examining the current and prior information on the Matter."
Sabi pa rito, hinihikayat na isumite sa Committee on Decorum ng PHSA ang mga reklamo kaugnay ng mga sinasabing insidente ng pang-aabuso para ito ay maaksiyunan.
Nakipag-ugnayan na rin daw ang DepEd sa PHSA Administration para suriin ang "existing policies" at "internal mechanisms" ng paaralan para siguraduhin ang safety ng mga estudyante sa loob ng paaralan.
Dagdag pa sa statement: "The Department would like to reiterate that the agency does not tolerate abuses in any form.
"Under the strong leadership of Secretary Sara Duterte, DepEd will continuosly promote a healthy and safe environment for our learners and teachers."
In-acknowledge ito ng PHSA management, base sa maiksing pahayag sa Facebook page ng boarding school ngayong July 12.
Sabi rito: "The PHSA management and community are currently working hand in hand together with DepEd in making sure that its environment is safe for its employees and students.
"We will be in constant communication with DepEd and will implement protocols to ensure safe spaces for everyone."
Noong June 28, 2022, inulat ng Vice World News, isang online news site na nakabase sa New York, ang tungkol sa appeal letter na pirmado ng "89 current students and 79 alumni" ng PHSA.
Nais maimbestigan ng grupo ng PHSA students and alumni ang anila'y kawalan ng aksyon ng paaralan sa matagal na umanong "culture of abuse" na talamak sa boarding school dahil sa walang "clear boundaries" sa pagitan ng "adult staff" at "students."
Paniwala ng sources na nakausap ng Vice World News, hindi umano nalulutas ang multiple complaints ng mga biktima ng pang-aabuso dahil sa hirap ng proseso para maiparating ang reklamo sa kinauukulan sa paaralan.
PHSA: "unfair" to be called "haven for abuse"
Sinagot ng PHSA ang kontrobersiyang kinasasangkutan nito.
Sa official statement ng PHSA noong July 5, 2022, nakasaad na nakikisimpatiya ito sa mga nagpakilalang biktima ng pang-aabuso noong panahong nag-aaral pa ang mga ito sa PHSA.
Pero "unfair" daw ang "sweeping generalization" na ipinta ang PHSA na "haven for abuse."
Idiniin ng paaralan na bukas ang designated committee ng PHSA sa mga nais magsumite ng pormal na reklamo sa mga insidenteng pang-aabuso na natukoy sa news report.
Binanggit din ng PHSA na bago pa raw nagsimula ang pandemya noong 2020 ay may ipinatupad silang safety measures para protektahan ang kapakanan ng mga estudyante.
Mayroon din daw student services, parent-teacher conferences, at educational drives na ipinatutupad ang paaralan para sa kung anumang concerns ng PHSA students.
Bahagi ng statement ng PHSA: "As felt by many of our alumni, teachers and staff, some of whom have worked at PHSA for more than 20 years, the sweeping generalization, as shown in the articles portraying the PHSA as haven for abuse, is unfair.
"PHSA, just like any other instution, is not perfect. But please be assured all our School personnel are working hand in hand towards providing our students a safe learning environment, whether online or in Makiling."
JEROM CANLAS ON ALLEGED INCIDENT OF SEXUAL HARASSMENT
Isa sa mga nagpakilalang biktima ng pang-aabuso noong siya ay estudyante ng PHSA ay ang theater actor na si Jerom Canlas, kapatid ng aktor na si Elijah Canlas.
Noong June 24, 2022, unang naiulat sa PEP.ph ang kuwento ni Jerom tungkol sa taong tinukoy niya na nang-harass umano sa kanya.
READ: Jerom Canlas uncovers sexual harassment in theater industry to protect brother Elijah Canlas
Pareho iyon ng salaysay niya sa Vice Asia News, na nailathala noong June 29, 2022.
Salaysay ni Jerom, madalas siyang pinagre-rehearse ng teacher niya sa bahay nito kapag weekend dahil may conflict of schedule sa "theater work" ng kanyang teacher na di niya tinukoy ang pangalan.
Dahil gabi na natatapos ang rehearsals, pinapatulog na raw siya ng teacher sa bahay nito, at sa mga pagkakataong ito naganap ang diumano'y panghihipo sa kanya habang tinatabihan siya nito sa pagtulog.
Wala raw ideya noon si Jerom na maituturing na sexual abuse ang naranasan niya dahil 13 taong gulang lamang siya nang maganap ang insidente.
Pumanaw na ang teacher niyang iyon.
Bilang PHSA alumnus, nanindigan si Jerom sa kanyang Facebook post noong July 8, 2022 na totoo ang naranasan niyang pang-aabuso noong nag-aaral pa siya sa PHSA.
Sinabi ni Jerom na bagamat nangyari ang dinanas niyang "harassment" sa labas ng school premises, ang dahilan kaya raw sila magkasama ng kanyang guro noon ay para sa school-related activity.
"Rehearsals kasi yun para sa recital—na isang required school activity. May mga permission slip pa nga ‘yan na kailangang pirmahan ng parent/guardian.
"Sigurado akong makukumpirma rin ito ng mga ka-major ko diyan na naabutan sa bundok," bahagi ng post ni Jerom.
Kasabay nito ay umapela si Jerom na umaasa siyang masiguro na "safe space" ang PHSA para sa mga estudyanteng nag-aaral dito.
Nananatiling bukas ang PEP.ph (Philippine Entertainment Portal) sa anumang pahayag ng mga personalidad o institution na nabanggit sa artikulong ito.