Kasal na si Olympic gold medalist Hidilyn Diaz sa kanyang weightlifting coach na si Julius Naranjo.
Pareho silang 31 taong gulang.
Ngayong Martes, July 26, 2022, idinaos ang Catholic wedding nila sa St. Ignatius Church sa PMA Baguio.
READ: Hidilyn Diaz at Julius Naranjo, ikakasal sa July 26 sa Baguio
Naghiyawan sa kilig ang mga bisita nang sabihin ng presiding priest na "You may kiss the bride."
Espesyal ang araw na ito dahil anibersaryo ng makasaysayang pagkapanalo ni Hidilyn bilang weightlifting champion sa Tokyo Olympics.
Ang off-shoulder wedding gown ni Hidilyn at ang barong ni Julius ay parehong gawa ng designer na si Francis Libiran.
Ang manager ni Hidilyn na si Noel Ferrer ay nagbahagi ng madamdaming mensahe para sa couple via Facebook.
Bahagi ng mensahe ni Noel: "In the journey ahead, may you be blessed with the weighty certainties of living, loving, and growing old together as you fulfill your promise to be there for each other.
"This is the only way that you can win—by letting love win at the end of every single day.
"Julius and Hidilyn, may you be gold to each other, gold for each other."
Mayroon silang 19 pares ng principal sponsors kabilang sina former Vice President Leni Robredo, Senator Manny Pacquiao, Manny Pangilinan, Ramon Ang, Virgie Ramos, Vicki Belo, Bo Sanchez, at ang mag-asawang Judy Ann Santos at Ryan Agoncillo.
Kahapon pa lang ay idinaos na ang welcome party para sa mga dumalo sa kasal ng couple.
Narito ang naunang Instagram post ni Hidilyn ukol dito:
HOW HIDILYN AND JULIUS MET
Weightlifting athlete si Julius ng magkakilala sila ni Hidilyn sa competition abroad. Sa Guam ang hometown ni Julius, at hindi niya kilala noon si Hidilyn.
Sa YouTube vlog ni Karen Davila nitong July 23, 2022, inamin ni Hidilyn na siya ang unang nagkagusto kay Julius.
Hindi pa raw niya coach ito noon.
Napapangiting balik-tanaw ni Hidilyn: "Ako yung nagtanong sa kanya after ng laro namin. Kasi brokenhearted ako ta's kasa-kasama ko siya sa inuman.
"Kasama ko siya kumain ng ice cream doon sa Turkmenistan.
"Ta's pag-uwi tinanong ko siya, 'Do you like me?'"
Pero hindi raw nagmadali si Julius na makarelasyon si Hidilyn. Ayaw daw niya magmukhang nag-take advantage siya sa pagkakaibigan nila.
"I said, 'Yeah, I like hanging out with you. I didn't wanna just jump straight into something. "I guess im traditional in a sense."
Pero kinalaunan ay naging sila rin.
HOW HIDILYN KNEW JULIUS IS "THE ONE"
Umpisa pa lang ay nasaksihan na ni Hidilyn ang sakripisyo ni Julius para sa kanya. Nang magkaroon ng opening para maging coach ni Hidilyn, pinili ni Julius na tutukan ang pag-train sa nobya.
Sinuko niya ang sariling career bilang national athlete sa Guam pati ang filmmaking work.
Sabi ni Hidilyn, "Nalaman ko na he's the one kasi nung first na pagpunta pa lang niya sa Pilipinas, parang wow, ito yung first lalake na nag-effort.
"Yun yung isa sa mga bagay na kailangan natin tignan. Kung mahal tayo ng isang tao. Nakita ko iyon sa kanya.
"Sinurrender niya yung buhay niya sa Guam para tulungan ako.
"He's the one kasi sinusuportahan niya ako sa sports na pinili ko, sa pangarap na akala ng iba imposible pero sa kanya nainiwala siya na kaya kong manalo ng gold."
ALMOST BREAKUP
May pagkakataon na muntik maghiwalay ang couple noong kasagsagan ng training ni Hidilyn sa Malaysia.
Hindi raw sila magkasama ng tinutuluyan noon dahil gusto ni Julius na magpokus si Hidilyn sa training nito.
"I think it was because I wouldn't give her time," pag-amin ni Julius. Natatawang sang-ayon ni Hidilyn, "Gusto ko lang ng atensyon."
Ayon kay Julis, more on binigyan lang siya ng silent treatment noon ni Hidilyn.
Aminado naman si Julius na isang bagay na nagustuhan niya kay Hidilyn ay ang passion nito para sa weightlifting.
Ani Julius, "Her willingness to sacrifice everything, even if it's our relationship. "So even sacrifice for the things she loves for weightlifting, for the country. That's something you don't find in a lot of peope.
"And I know that after her career, she'll put that same determination, she'll put more of that in our relationship, and hopefully our kids one day."
Plano raw nila magkaanak by 2024.