Pumanaw na si dating Presidente Fidel V. Ramos.
Binawian ng buhay si Ramos sa Makati Medical Center ngayong Linggo, July 31, 2022.
Siya ay 94.
Sa pamamagitan ng official statement ay kinumpirma ng pamilya ng ika-12 Pangulo ng Pilipinas ang kanyang pagkamatay.
Nakasaad dito: "The Ramos family is profoundly saddened to announce the passing of former President Fidel Valdez Ramos.
"We thank you all for respecting our privacy, as the family takes some time to grieve together.
"We will announce wake and funeral arrangements in the near future."
Isinilang si Ramos sa Lingayen, Pangasinan noong March 18, 1928.
Naglingkod siya bilang Chief ng Philippine Constabulary sa ilalim ng administrasyon ni former President Ferdinand Marcos Sr. mula 1972 hanggang 1986.
Isa si Ramos sa mga itinuturing na bayani ng People Power Revolution sa EDSA noong February 1986 dahil sa partisipasyon niya sa pagpapatalsik kay Marcos mula sa puwesto na hinawakan nito sa loob ng halos dalawampu’t isang taon.
Bago umupo bilang Pangulo ng Pilipinas, mula June 30,1992 hanggang June 30, 1998, naglingkod si Ramos bilang Chief of Staff ng Armed Forces of the Philippines (February 25, 1986- January 21, 1988) at Secretary of National Defense (January 22, 1988-July 18, 1991) sa administrasyon ni former Philippine President Corazon Aquino.
Naulila ni Ramos ang kanyang asawa, si dating First Lady Amelita Ramos, at ang kanilang apat na anak na babae.
Ang isa pa nilang anak ay ang singer na si Jo Ramos, na namatay noong June 27, 2011 dahil sa lung cancer.
Si Ramos ang Chairman Emeritus ng political party na Lakas- Christian Muslim Democrats (Lakas-CMD).
Ipinahayag ng co-chairman ng partido na si Senator Bong Revilla ang pagdadalamhati sa pagpanaw ng dating Pangulo.
Mensahe ni Revilla, “Hindi matatawaran ang naging pamana ni FVR sa bansa. Sa pamamagitan ng kanyang pamumuno ay umahon ang Pilipinas mula sa mga krisis na bumabalot sa bawat Pilipino ng mga panahon iyon.
“His legacy is the foundation upon which later administrations have built upon. He transformed the Philippines from being the sick man of Asia to the Tiger of the Region.”