Nakahanap ng kakampi si Vhong Navarro sa kinahaharap nitong mga asunto sa korte sa katauhan ng ex-wife niyang si Bianca Lapus.
Anumang araw mula ngayon ay nakaambang sampahan ng Taguig Prosecutor’s Office ng mga reklamong rape at acts of lasciviousness si Vhong, ayon sa kautusan ng Court of Appeals (CA).
Kaugnay ito sa isinampang complaint ng modelong si Deniece Cornejo sa Department of Justice (DOJ) laban sa actor-TV host.
Read: CA orders Taguig Prosecutors to file rape, acts of lasciviousness charges vs Vhong Navarro
Kahapon, August 2, 2022, nag-post si Bianca sa kanyang Twitter account ng mga larawan nila ng dating mister at ng anak nilang si Isaiah “Yce” Navarro.
Kuha ito sa selebrasyon nila noong nagtapos si Yce ng kursong Bachelor of Arts in Communication sa University of Sto. Tomas noong June 10, 2022.
Ipinaramdam ni Bianca ang kanyang suporta kay Vhong dahil isa raw itong mabuting tao.
Ayon pa sa aktres, kung hindi mabuting tao si Vhong, baka hindi naging madali sa kanya ang makipagkaibigan at maging co-parentang dating asawa.
Alam din daw niyang nasa panig ni Vhong ang katotoohanan.
Buong caption niya, “Standing by this GOOD MAN. Not perfect but definitely a good kind hearted man. Otherwise it won't be easy for me to become friends and co parent with him. The truth will prevail. Walang iwanan.”
Kalakip nito ang isang quote card sa kanyang tweet.
Nakasulat dito: “When you destroy someone’s life with lies, take it as a loan, it will come back to you with interest.”
Nitong nakaraang July 31, naisapubliko ang dalawampu’t anim (26) na pahinang desisyon ng Court of Appeals 14th Division kung saan pinaboran ng hukuman ang petition for review na inihain ni Deniece.
Isinantabi na ng CA ang mga resolusyon ng Department of Justice noong April 30, 2018 at July 14, 2020.
Inutusan ng CA ang Taguig Prosecutor’s Office na sampahan na sa korte si Vhong ng rape at acts of lasciviousness charges.
Sinabi naman ni Justice Secretary Jesus Crispin "Boying" Remulla kahapon, August 2, na susundin nila ang utos ng CA.
Read: DOJ to follow CA's order; Vhong Navarro camp says indictment order not yet final
Nagpakasal sina Vhong at Bianca noong January 20, 1998.Buntis na ang akyres nang sila ay humarap sa dambana.
Pero hindi nagtagal ay nagkahiwalay rin ang dalawa.
Nag-file ng annulment petition sa korte si Vhong noong May 5, 2005 para mapawalang bisa ang kasal nila ni Bianca.
July 2008 nang igawad ng Court of Appeals ang kanilang annulment.
Read: Court of Appeals finally grants annulment of Vhong Navarro's marriage to Bianca Lapus