Sa huli ay nanaig pa rin ang pagkakaibigan kaysa sa pulitika.
Ito ang pinatunayan nina former Senator Manny Pacquiao at former Ilocos Sur Governor Chavit Singson sa pagbaon nila sa kanilang alitan.
Read: Chavit Singson, hindi kasama sa mga pinasalamatan ni Manny Pacquiao sa pagreretiro niya sa boxing
Sa Instagram kahapon, August 29, 2022, ibinahagi ng anak ni Chavit na si Ako Ilocano Ako Party List Representative Richelle Singson-Michael ang larawan at video kung saan nagyakapan ang kanyang ama at si Manny.
Hudyat ito ng pagbabati ng dalawang kilalang personalidad.
Caption ni Richelle: “Because Friendship is stronger than Politics. [heart emoji]”
View this post on Instagram
Setyembre noong nakaraang taon, sa pag-anunsiyo ni Manny ng kanyang pagreretiro sa boxing dahil sa pagsabak niya sa 2022 presidential elections, pinasalamatan ni Pacquiao ang lahat ng mga taong naging bahagi ng kanyang tagumpay bilang boksingero.
Halos limampung pamilya at tao ang pinasalamatan ng Pambansang Kamao.
Pero marami ang nagtaka dahil hindi niya binanggit ang pangalan ng businessman at politician na si Chavit, na incumbent mayor pa noon ng Narvacan, Ilocos Sur.
Matagal at malalim ang pinagsamahan ng dalawa dahil hindi nawawala si Singson sa mga laban noon ni Pacquiao.
Bago pa nito, ikinagulat ng karamihan ang hindi pagsuporta ng seasoned politician sa laban ni Manny kay Yordenis Ugas sa Las Vegas, Nevada noong August 2021.
Bago nangyari ang Pacquiao-Ugas fight, nagsalita si Singson sa Bombo Radyo Philippines tungkol sa hidwaan nila ng kanyang dating kaibigan.
Aniya, "First time kong di nanood, dahil sa paglaglag niya sa akin na wala sa lugar."
Inamin ni Chavit na nagkaroon sila ng hindi pagkakaunawaan ni Pacquiao dahil sa kagustuhan ng senador pa noon na taasan ang buwis sa tobacco industry, na isa sa mga ikinabubuhay ng mga mamamayan ng Ilocos.
“Mag-aral ka muna!” payo ni Singson kay Pacquiao nang tanggihan nito ang pakiusap ng una na huwag dagdagan ang buwis sa tabako.
Para kay Pacquiao, bisyo ang sigarilyo at hindi dapat taasan ang presyo ng bigas at ng mga pagkain kaya tinanggihan niya ang hiling ni Singson.
Pahayag noon ni Pacquiao: “Kinausap niya ako sa tobacco tax increase. Huwag ko daw ituloy.
"Pero sabi ko, 'Pasensiya ka na. Best friend kita pero hindi kita mapagbibigyan.'"
Sa nakaraang halalan, ang sinuportahan ni Chavit ay ang tandem nina Ferdinand Marcos Jr. at Sara Duterte.
Pumangatlo si Manny sa presidential race.