Ibinahagi ni Mikee Cojuangco, 48, ang tungkol sa dalawang aktor na nag-away noon dahil sa kanya.
Si Mikee ay equestrienne na nag-venture sa showbiz noong mid-1990s hanggang early 2000.
Ikinasal siya kay incumbent Pasig Vice Mayor Dodot Jaworksi noong 1999. Mayroon silang tatlong anak.
Naging guest si Mikee sa Surprise Guest with Pia Arcangel vlog nitong November 3, 2022.
Tinanong siya kung nagkaroon ba siya ng manliligaw na aktor noon na binasted niya.
Nag-atubili si Mikee, pero inamin niyang nagkaroon siya ng ganitong karanasan.
“Matagal na. Hopefully nakalimutan na nila iyon. But there were two actors...” sabi ni Mikee, na pinsan ni Kris Aquino.
“Nabasa ko na nag-aaway daw sila because both of them daw may gusto sa akin.
"And I was, like, ‘Really?’ Parang ako, nung time na iyon, I was laughing about it.’”
Naging tampulan daw ng panunukso si Mikee ng mga tao sa paligid niya.
“Kasi niloloko ako ng mga staff na, ‘Uy, nanliligaw pala sa iyo. Alam mo ba? Baka naman marami nang nanliligaw sa iyo, hindi mo pa alam kasi puro kabayo lang ang inaatupag mo.’
"Ginaganoon nila ako!" natatawag kuwento ni Mikee.
THE INCIDENT WITH TWO ACTORS
Pero nagkaroon daw ng pangyayari na nagpang-abot ang dalawang aktor na ito na hindi pinangalanan ni Mikee.
“One day, I was dubbing. I was dubbing for a film, 'tapos dumating yung isa kasi siguro may project din sila doon.
“So the usual, [sabi ko] ‘Mamaya, mamaya, nagtatrabaho ako.’ Ang sungit, e, 'no?” pagbabahagi ng nangingiting si Mikee.
“’Tapos dumating yung isa kasi nalaman nga nandoon ako. E, may work din nearby.
“Wala pang cellphone noon.”
Habang nagda-dub daw si Mikee, may isang assistant na pumasok at sinabihan siyang nag-aaway ang dalawang aktor sa labas.
Humingi raw ng tulong si Mikee sa direktor ng ginagawang pelikula na naroon sa dubbing session.
Lahad niya, “I called the director of the film that I was dubbing for, ‘Direk, ganyan-ganyan.’
“Sabi niya, ‘E, hindi ako nagtatrabaho ngayon, e.’ Mukhang nakainom.
“So I was, like, ‘No one’s gonna help me,’ kasi wala naman siyang [direktor] work, di ba?”
Lumabas daw si Mikee at hinarap ang dalawang aktor.
“So, lumabas ako, ‘Alam niyo, istorbo kayo,’ as in ganoon kasi nga I’m an athlete, right?
“Ako, sanay ako na ginaganun ako, e, di ba? I’m used to that kasi it’s business.”
Naging prangka si Mikee sa dalawang aktor na nag-away.
Sabi raw ni Mikee sa kanila: “Alam niyo nagtatrabaho ako. Kung nandito kayo dahil gusto niyo na pasayahin ako kasi interesado kayo, ako na mismo nagsasabi sa inyo na hindi ako natutuwa...
“Kung gusto niyong mag-away, okay lang. Pero useless na pag-awayan niyo ako kasi hindi naman ako pipili ng kahit isa sa inyo.
“’Kasi inistorbo niyo ako, e. If you wanna show interest, first, you show respect. I’m working. Trabaho niyo rin ito, di ba?"
Ang basa raw ni Mikee sa dalawang aktor ay akala ng mga ito ay kikiligin siya na pinag-aawayan.
“Parang yung face nila, parang, ‘Yes, kasi siyempre nakakakilig if someone would do this for us…’”
Ipinamukha raw ni Mikee na hindi siya natuwa sa kanilang ginawa.
“’Nag-aksaya kayo ng oras ko,’" sabi raw ni Mikee sa kanila.
"Sabi ko, ‘Alam niyo naman na nagti-training ako. Ano ito? Five minutes na akong nandito, nakikipag-usap sa inyo. That’s five minutes more sleep that I could have gotten before I train.’”
Mula raw noon ay hindi na nakarinig muli si Mikee sa dalawang aktor na ito.
“Never. Never na. Thank you Lord, di ba?”
Ngayong inaalala raw ito ni Mikee ay natatawa siya sa pangyayaring iyon.
Twenty-one years old lang noon si Mikee, at patunay raw iyon na noon pa man “I was very serious about my work.”
Sabi niya, “’Trabaho ito. Leave me alone,’ Parang ganoon, di ba?”
Sa vlog, sinabi ni Mikee na sa kabuuan ay siyam na pelikula ang nagawa niya.
Kabilang sa mga naging leading man niya noon ay sina Aga Muhlach at Cesar Montano.