Usap-usapan ngayon sa social media ang pag-call out ng isang beach resort sa dalawang vloggers na naging guests nito.
Sa post ng Jakka Beach Resort noong November 6, 2022, makikita ang iba't ibang bahagi ng villa na puno ng kalat na kagagawan diumano ng mga vloggers at ng kanilang mga kasamahan.
Kita sa photos ang iniwang pinagkainan, maruming kusina, at magulong higaan.
Ayon sa beach resort, maituturing ito na bandalismo at paglabag sa policies nito.
Ang siste, naka-tag sa post ng Jakka Beach Resort ang dalawang vloggers na naging guests.
Bahagi ng post ng resort: “We are very saddened that we need to experience this kind of chaos to our Family Villa (pictures posted).”
“We need you and we serve you the best that you need [name of two vloggers].
“We considered your plead and attend all your concerns yet this is what you did to our Villa so what else can we say but THANK YOU .
“We are hoping that you will not do the same to your future destinations.”
VLOGGERS REACT
Umani ng magkahalong reaksiyon ang post ng resort.
Komento ng mga nakisimpatiya, ikinalulungkot nila ang nangyari at nauunawaan nila ang pinanggagalingan ng resort.
Pero pinuna ng ibang netizens ang paraan ng pagtawag ng hotel sa attention ng vloggers dahil tinag pa sila sa post.
Puwede naman daw kasing idaan ito sa maayos na pag-uusap.
Sumagot naman agad ang female vloggers sa pamamagitan ng Facebook Live, kasunod ng matinding batikos na natanggap nila sa social media.
Nangatuwiran ang vloggers gamit ang kanilang local dialect kung bakit ganoon ang sitwasyon ng villa.
Depensa nila, fully paid ang PHP21,000 accommodation fee nila sa resort at may dagdag pa raw na “extra fees” para sa paggamit ng kitchen utensils.
Nanindigan silang walang sinirang gamit at wala rin daw naka-post sa villa na kailangan nilang maglinis bago umalis.
Sinabi rin nilang nagmadali silang umalis dahil malayo pa ang kanilang biyahe pauwi sa Butuan City.
RESORT’S OFFICIAL STATEMENT
Naglabas ng official statement ang Jakka Beach Resort nitong November 7, 2022.
Humingi ito ng paumanhin sa publiko dahil sa paglaki ng isyu.
Hindi rin daw nito intensiyong hiyain ang mga guests.
Post nito (published as is): “We sincerely apologized [sic] to the public that this matter has escalated.
“It is not our intention to publicly shame or embarrass the guests of our resort by tagging them in our post.
“The only reason that we posted the unsightly pictures of the resort is for public awareness.”
Pero itinanggi nitong walang nilabag na policies ang biker group.
Iginiit ng resort, “Upon booking, guest of our resort are informed of the policies and are strictly encouraged to abide by them.”
Aware daw ang guests sa serbisyo ng resort “during their stay as contained in our policies and guidelines sent to them via Messenger.”
Hirit pa ng resort: “This is the first time that a guest left the resort in a very untidy condition.”
Idinetalye pa nito ang ginawang kalat at damage umano ng grupo.
“Items were moved and trashes are everywhere…”
Bagamat bukas ang becah resort sa anumang komento mula sa mga guests, “we do not tolerate any form of vandalism on the resort and any violation of our established policies.”
Mayroon naman daw silang housekeeping na maglilinis ng kalat, “but we require to at least observe cleanliness as much as possible.”
Isinawalat pa ng resort na sinadya umano ng guests ang pagkakalat.
Anila: "It was clear that the act of our guest was deliberate because of some misunderstandings.
“In fact, while it was not shown in the picture, a damage was actually caused to the property.”
Dagdag ng management: “We have exerted efforts to talk with our guests so that the matter will be addressed privately however they did not afford us a chance to do so and instead chose to air their complaints on social media.”
Sinisikap umano ng management na magbigay ng magandang serbisyo sa mga guests "however we admit that we still have a lot to improve on in terms of our services.
Dagdag nito, “We will strive to continue to upgrade our facilities and to improve our services to better provide the needs of our guests in the future.”
MAY VIOLATION BA SA PAG-TAG NG VLOGGERS?
Samantala, legit ang concern ng ibang netizens sa pagta-tag ng resort sa FB accounts ng dalawang rider vloggers.
Paglabag ba ito sa Data Privacy Act?
Ang batas na ito ay para mapangalagaan ang “fundamental human right of every individual to privacy while ensuring free flow of information for innovation, growth, and national development.”
Nilabag ba ng resort ang batas na ito?
Ani Atty. Sandra Marie Olasco-Coronel ng Yorac+ Sarmiento Arroyo Chua+ Coronel & Reyes Law Office, may paglabag sa batas na ito kung pinapirma ng waiver of privacy ang guests.
Maliban na lamang kung nagkaroon ng kasunduan, gaya ng promotional arrangement, sa pagitan ng resort management at vloggers.
Katulad ng ex-deal kung saan magba-vlog ang vloggers ng experience nila sa resort kapalit ng special rate, na posibleng maging dahilan para ma-waive ang privacy ng vloggers.
Pero kung may pinirmahang waiver of privacy ang guests, lalo pa at nabanggit ng vloggers sa kanilang FB Live na nagbayad ang mga ito ng fee sa beach resort, posible raw na may violation sa Data Privacy Act.