Kinumpirma ng business tycoon na si Victor Consunji na inireklamo ng qualified theft ang trusted employee niyang si Lana Faith Johnson.
Si Victor ay founder at CEO ng construction at real estate company na Victor Consunji Development Corp. o VCDC. Director din siya sa family-owned mega construction at real estate company na DMCI Holdings Inc.
Estranged wife ni Victor ang dating beauty queen-host na si Maggie Wilson.
Ang empleyado ni Victor na si Lana ay director of public relations ng VCDC, ayon sa linkedin bio nito.
Noong November 8, 2022, naaresto si Lana ng awtoridad sa isang "entrapment" operation matapos itong mag-isyu ng diumano'y pekeng resibo sa isang kliyente ng DMCI Homes.
Sa ulat ng Philippine Daily Inquirer kagabi, November 16, 2022, inamin ni Victor na bago ang napabalitang pag-aresto ng pulisya kay Lana, nagkaroon ng internal investigation sa diumano'y maanomalyang mga transaksayon ni Lana sa kanyang kumpanya.
Tinawag ni Victor na "insane" ang diumano'y panloloko at pagnanakaw ni Lana matapos ipagkatiwala rito ang malalaking proyekto ng VCDC.
Matagal na raw gumagawa si Lana ng minor PR work para sa VCDC, pero noong late 2021 lamang ito binigyan ng "agency posisyon" kunsaan nakikipagtransaksiyon ito sa mga supplier ng real estate projects ng VCDC.
Ayon kay Victor, isang matagal na niyang kaibigang supplier ng interior design ng ilang VCDC properties ang inisyuhan umano ni Lana ng "unfunded checks" o mga tsekeng tumalbog.
Ikinaalarma raw ito ni Victor dahil sa pagkakaalam niya ay umpisa pa lang ng taong 2022 ay naaprubahan na ang budget para sa supplier na iyon, at matagal na dapat nasarado ang transaksiyon.
Bukod dito, nadiskubre rin ni Victor na maraming pinagkakautangan si Lana.
Ayon kay Victor, "...she would get money that was earmarked for a project to pay off some supplier she owes and get money from a different client to pay off that person."
Napag-alaman din umano ni Victor na sarado na ang sinasabi ni Lana na PR company nito, na nag-iisyu umano ng mga pekeng resibo.
VICTOR ON HOW LANA EXECUTED ALLEGED SCHEME
Tinawag ni Victor na sukdulan ang tindi ng panloloko umano ni Lana sa sirkulo ng kanilang mga katrabaho, na karamihan ay malalapit na kaibigan daw ni Victor.
Para hindi ito mabuko, ginamit pa raw siyang excuse ni Lana sa hinabi nitong mga kasinungalingan.
Sabi pa rin ni Victor sa Inquirer, "What she would do is intentionally drive them away so that they would not talk to each other about these matters.
"She would make up some fake excuses, like 'Victor is stressed' or 'so-and-so is having marital problems.'
"She would also talk about other suppliers and say things like they didn’t do a good job on their last project. These ridiculous excuses eventually just imploded."
MORE LEGAL COMPLAINTS AGAINST TRUSTED EMPLOYEE?
Hindi raw palalampasin ng kumpanya ni Victor ang panloloko ni Lana.
"One thing that is absolutely not forgivable in any amount, in any capacity is maliciousness.
"When it was validated that her actions were malicious, intentionally skimming money from suppliers and not paying them and then trying to spew lies about herself and the people she works with, there was no other recourse but to take action," diin niya.
Nakatakda raw magsampa ang VCDC ng "64 qualified theft" complaints laban kay Lana, bukod sa qualified theft na unang isinumite ng VCDC noong November 4, 2022.
Noong November 13, 2022, naunang naglabas ng pahayag ang estranged wife ni Victor na si Maggie ukol sa kontrobersiyang kinahaharap ni Lana.
Sinabi ni Maggie na saksi siya sa diumano'y pagmamanipula ni Lana kay Victor.
Pero hindi raw siya pinakinggan ng asawa kahit matagal na siyang kinutuban kay Lana.
Bahagi ng pahayag ni Maggie: "I tried to protect you but instead you chose to believe her over me. I always had your back and best interests.
"A woman’s intuition is always right. She used me to divert the attention.
"I thought you’d be smart enough to see through it. She manipulated you, made you so preoccupied with trying to discredit and attack me so that she could continue stealing from you, from us."
Naghiwalay sina Maggie at Victor noong September 2021.
LANA JOHNSON POSTS BAIL
Sa kabilang banda, nakapagpiyansa si Lana matapos itong maaresto sa reklamong falsification of document na isinampa ng isang kliyente ng DMCI Homes, ayon sa hiwalay na ulat ng bilyonaryo.com kahapon, November 16, 2022.
Sinabi ni Lana sa bilyonaryo.com na may hiwalay na tatlong reklamo na isinampa laban sa kanya ang isang "trusted aide" ni Victor, pero nabasura umano ito ng piskalya dahil sa kawalan ng sapat na ebidensiya. Hindi malinaw kung ano mismo ang mga reklamong iyon.
Liban dito ay wala pang opisyal na pahayag si Lana sa kinahaharap na kontrobersiya.
Nakapribado na rin ang Instagram account ni Lana habang isinusulat ang artikulong ito.
Bukas ang PEP.ph (Philippine Entertainment Portal) sa anumang pahayag ng mga personalidad na nabanggit sa artikulong ito.