Si Coleen Garcia ang nanalong pinakamahusay na aktres sa 4th El Grito International Fantastic Film Festival na ginanap sa Cine Unidos ng Sambil San Cristobal, Venezuela, mula November 22 hanggang November 25, 2022.
Nanalo si Coleen para sa kanyang pagganap sa Kaluskos, ang horror movie ng direktor na si Roman Perez Jr.na nagbukas sa Philippine cinemas noong November 30, 2022.
Read: Coleen Garcia says husband Billy Crawford supportive of her showbiz comeback
Nakumpirma ang tagumpay ni Coleen sa 4th El Grito International Fantastic Film Festival dahil sa email na ipinadala g festival organizers kay Direk Roman.
Nakasaad sa email: “The jury made up of Lina Duran [director of the Insolito Festival], Hernan Moyano [producer and director], and Cristian Jaramillo [director of the Fantasmagoria Festival] have awarded Coleen Garcia the best actress award.
“From the organization, we want to congratulate you on this well-deserved recognition. It is an honor to have had your participation and include your work in our catalog of winners.”
Maligayang-maligaya si Direk Roman dahil dalawa sa mga artista ng kanyang mga pelikula ang nanalo ng mga acting award sa mga international festival.
Bago si Coleen, nagwaging best actress si Kylie Verzosa sa 2022 Distinctive International Arab Festival Awards sa Dubai noong nakaraang buwan para sa Philippine adaptation ng South erotic psychological thriller movie na The Housemaid.
Read: Kylie Verzosa, waging best actress sa Dubai para sa "The Housemaid"
Hindi pa nagbibigay ng pahayag si Coleen tungkol sa international acting award na ipinagkaloob sa kanya.
Pero sa nakaraang digital media conference ng Kaluskos, nagpasalamat siya sa lahat ng mga pumuri sa pagganap niya nang ipalabas ang nabanggit na pelikula sa Cinemalaya 2022 noong Agosto.