Philippines represent!
Nagsuportahan ang mga artista mula sa dalawang magkatapat na networks sa Pilipinas sa katatapos lamang na Asian Academy Creative Awards 2022 na ginanap sa Singapore nitong Huwebes, December 8, 2022.
Patunay itong namamayani pa rin ang kapatiran ng mga Pilipino kapag tinawag ng pagkakataon.
Ito ang nangyari nang dumalo ang Kapamilya actresses na sina Jodi Sta. Maria at Dimples Romana at Kapuso actresses na sina Kylie Padilla at Andrea Torres sa awards night ng Asia-Pacific award-giving body.
Si Jodi ang itinanghal na Best Actress in a Leading Role para sa kanyang pagganap sa The Broken Marriage Vow, ang Philippine adaptation ng BBC series na Doctor Foster.
Nang tawagin ang pangalan ni Jodi, hindi naitago ni Dimples ang saya niya para sa kaibigan at fellow Kapamilya actress.
Pero nahagip din sa camera ang tuwang-tuwang si Kylie na pumapalakpak sa pagkapanalo ni Jodi.
Sa simulang bahagi ay makikita pang napatalon si Kylie sa kanyang kinauupuan nang matawag ang pangalan ni Jodi.
Kylie (face not shown) was caught on camera doing a little jump from her seat when Jodi Sta. Maria's (right, forefront) name was called for the Best Actress in the Leading Role award.
Nasa harap sina Jodi at Dimples, at hindi nalalayo sa kanilang likuran nakapuwesto si Kylie katabi si Andrea.
Bakas din ang proud reaction ni Kylie habang nagbibigay ng kanyang acceptance speech si Jodi.
Kita rin ang pagpalakpak ni Andrea para kay Jodi nang bumalik ang Kapamilya actress sa kanyang kinauupuan.
Ipinakita rin nina Kylie at Andrea ang suporta kay Jodi nang mag-post sila ng pagbati kay Jodi sa kanilang Instagram Stories.
JODI’S SUPPORT FOR KYLIE AND ANDREA
Samantala, nagpakita rin ng suporta si Jodi kina Kylie at Andrea sa earlier part ng programa.
Ang dalawang Kapuso actresses ang presenters ng Best Non Scripted Entertainment award.
Nang tawagin ang pangalan nina Kylie at Andrea para umakyat sa stage, nahagip si Jodi ng camera na nasa front row. Bumaling siya sa likod para tingnan sina Kylie at Andrea.
Itinaas pa ng nakangiting si Jodi ang kanyang mga kamay habang pinapalakpakan ang dalawang Kapuso stars.
Sina Kylie at Andrea ay imbitado sa event para tanggapin ang Best Comedy Program award para sa kanilang TV series na BetCin.
Samantala, join forces sina Jodi, Dimples, Kylie, Andrea na nagpa-picture kasama ang kani-kanilang production team.
Ipinost ito ni Deo Endrinal, head ng ABS-CBN production company na Dreamscape, na siyang nagprodyus ng The Broken Marriage Vow.
Caption dito ni Deo: "Philippines Represent, ABS-CBN x GMA x Rein."
Ang Rein Entertainment ang production company na nagprodyus ng Betcin nina Kylie at Andrea.
Ni-repost naman nina Kylie at Andrea ang post na ito ni Deo kasama ang Kapamilya stars.
