Hindi ipinagkaila ni Dolly de Leon ang sakit na naramdaman nang hindi siya magkaroon ng nominasyon sa best supporting actress category ng 95th Academy Awards o Oscars na isinapubliko noong January 24, 2023.
Read: Oscars 2023 nominations: Filipino actress Dolly de Leon snubbed for Best Supporting Actress
Nagpakatotoo si Dolly sa pahayag nitong umiyak siya at tatlong araw niyang dinamdam ang nangyari.
Saad niya, “Ang initial reaction ko talaga? Umiyak ako. Nalungkot ako. I felt bad.
“I felt bad for about two to three days and after that, okay na ako kasi…
"I mean, I’m not gonna lie. I’m not gonna pretend na okay lang sa akin na hindi ako na-nominate noong time na yon.
“Siyempre, sumama ang loob ko kasi ang daming nag-uusap na baka... baka…baka…
“So, parang na-ingrain sa utak ko na, ‘Oo, baka nga. Baka nga.'
“So, nung hindi ko nakuha, sumama yung loob ko."
Pagpapatuloy ni Dolly, "Pero after that, nag-move on na ako. Okay na ako.
"Para sa akin, this is a game that we’re all playing, if we think about it… this award thing.
“Great… ang ganda kung may recognition, may award, pero at the end of the day, sana let the work speak for itself.
“That is not to discredit the nominees. For me, I have so much respect for each and everyone of them.
“Kung anuman yung outcome, yung nangyari, okay na. All good. It’s good.”
Ang mga na-nominate bilang Best Supporting Actress sa 95th Academy Awards ay sina Angela Bassett (Black Panther: Wakanda Forever), Hong Chau (The Whale), Kerry Condon (The Banshees of Inisherin), Jamie Lee Curtis (Everything Everywhere All At Once), at Stephanie Hsu (Everything Everywhere All At Once).
Hindi man nakakuha ng nominasyon si Dolly, nominado namang Best Picture ang Triangle of Sadness at best director si Ruben Östlund.
Umaasa pa rin ang Filipino actress na maiimbitahan siya sa gabi ng parangal na mangyayari sa March 13, 2023.
“Definitely, hoping for that. Gusto kong pumunta doon and hinihintay ko lang kung ano talaga yung plan.
"Kasi yung totoo, hindi pa namin alam kung kasama kaming lahat.
“Yes, I wanna go. Gusto ko, gusto kong ma-experience,” sabi ni Dolly.
Bumalik sa Pilipinas si Dolly noong nakaraang linggo dahil dumalo siya sa paglulunsad ng Project Hulmahan na naganap sa University of the Philippines Hotel nitong Miyerkules ng hapon, February 1, 2023.
Mananatili si Dolly sa Pilipinas hanggang February 15 dahil kinabukasan, February 16, lilipad na siya sa London para sa 76th British Academy of Film and Television Awards (BAFTA) ceremony.
Nominado si Dolly na best supporting actress para sa kanyang mahusay na pagganap sa Triangle of Sadness.
Ang BAFTA ang itinuturing na Oscar Awards ng United Kingdom.
Read: Dolly de Leon nominated for Best Supporting Actress at BAFTA 2023
“From here na ako manggagaling. Sa February 16 na ako lilipad papuntang London tapos mag-stay ako doon ng one week para wala lang, magpahinga.
"And then, babalik ako ng States," lahad ni Dolly.
Idaraos ang BAFTA sa Royal Festival Hall ng Southbank Centre sa February 19.