Hindi naging madali ang buhay ng dating Introvoys drummer-vocalist na si Paco Arespacochaga nang lisanin niya ang Pilipinas at makipagsapalaran sa Amerika.
Sikat pa si Paco sa bansa noong 2001 pero tinalikuran niya ito para sa kanyang American dream.
Pero, bigo siyang makapagtrabaho sa isang international label dahil hindi siya citizen ng Amerika.
Taliwas sa kanyang kasikatan sa Pilipinas, naranasan daw niyang maging kargador at kahero doon para lang mabuhay.
Kuwento ni Paco sa Magandang Buhay kahapon, March 1, 2023, “Pupunta na ako sa States para mag-work dito sa international record label.
“Pagdating ko roon nag-sign na ako ng form, ipinatawag ako ng HR kasi sabi nila, 'We need your US social security number.'
“Sabi ko, 'I only have my Filipino social security, SSS.' 'Are you a citizen or green card holder?'
“Sabi ko, 'No, I am a tourist.' Nakita ko na yung mukha nag-iba.
“So, in other words, hindi ako natanggap, hindi ako eligible to work.”
Hindi na raw niya ito mabawi sa kanyang mga tagahanga sa bansa dahil sa “pride.”
Aniya, “Pero na-announce ko na sa Pilipinas na successful ako, ayaw ko bumalik. So diniretso ko na, wala sa intensiyon ko na iwanan ang career para gawin yung ginawa ko sa Amerika.”
Dagdag pa niya, "Naging kargador ako dun kasi hindi ako natanggap sa label.
“Ang ginawa ko, ayaw ko umuwi, so nagtrabaho ako as kargador for a beauty warehouse.
“Tapos noon, nagtrabaho ako sa electronic store. Sa electronic store, naging kahero ako roon.
“Sa beauty warehouse, hindi ko makakalimutan yun, jetlag ako, umiiyak ako dahil sabi ng manager ko, 'Dati napapanood kita sa TV, ngayon tauhan kita.'
“So kailangan kong kainin ang pride na yon, nilamon ko yung pride na yon talaga.”
Hindi rin niya nakalimutang makaranas na makutya ng iilang Pinoy sa Amerika noong nakita siyang naglilinis ng banyo.
Kuwento pa niya, "Doon sa electronic store naman, six hours kahero, one hour taga-collect ka ng push carts, isang oras tagalinis ka ng bathroom at taga-balik ng product.
“Habang naglilinis ako ng bathroom, may mga Pinoy nakita yung name tag ko.
“Sabi, 'O, si Paco Arespacochaga pala ito,’ sabay umihi sa sahig.
“'O, pre linisin mo ito kung hindi ire-report ka.' Totoo yun.
“I mean don't get me wrong, it's not all Pinoys. But there are rotten apples everywhere.
"And to think na while that was happening, I was newly remarried so mayroon akong domestic challenges, di ba, tapos mayroon akong personal career challenges, so puro challenges lahat yon.”
Ilan sa mga sikat na awitin ng Introvoys ay ang “Line to Heaven” at “Kailanman.”