#EatBulagaWar
Nagpahaging sina Joey de Leon at Vic Sotto kaugnay ng kinahaharap na isyu ngayon ng Eat Bulaga!
Sina Tito Sotto, Vic, at Joey ang original hosts ng noontime show na nasa ika-44 taon na ngayong 2023.
Ikinababahala ng hosts at empleyado ng Eat Bulaga! ang nakaambang “rebranding” ng programa sa susunod na buwan. Bunsod nito, inaasahan ang malaking pagbabago sa longest-running noontime show sa bansa.
Read: Eat Bulaga relaunching, nakatakda sa April 17?
Ito ay kasunod ng usap-usapang ite-takeover na ng mga anak ni dating Zamboanga del Norte Congressman Romeo Jalosjos ang pamamahala sa Television and Productions Exponents (TAPE) Inc., ang producer ng Eat Bulaga!.
Read: Romy Jalosjos children in, Tony Tuviera out sa TAPE; Tito, Vic & Joey, aalis na sa Eat Bulaga?
Bagamat wala pang direktang pahayag ang Eat Bulaga! hosts hinggil sa isyu, may mga makahulugang banat sina Vic at Joey sa live episode ng programa noong Sabado, March 11, 2023.
VIC: “GAGANUNIN MO LANG.”
Sa "Bawal Judgmental" segment noong Sabado, itinampok ang mga estudyanteng nabigyan ng scholarship ng Eat Bulaga! sa pamamagitan ng Eat Bulaga Excellent Student o EBEST.
Hiningan ng mensahe ang participant na si Jaydee Lucero, isang EBEST scholar na nagtapos ng magna cum laude sa UP Diliman at Top 1 sa board exam noong 2018.
Bahagi ng pahayag ni Jaydee, “Magtiwala kayo sa mga sumusuporta sa inyo, sa journey ninyo, friends ninyo, mga magulang and lastly po yung…”
Hindi pa tapos magsalita si Jaydee ay sumingit na si Joey.
Sabi ng beteranong TV host: “Basta tandaan mo, Jaydee, hangga’t may bata, may Eat Bulaga!.
“Hangga’t may Eat Bulaga!, e, merong mga katulad niyo.
“Sana wag mawala yung Eat Bulaga!. Yun lang… yun lang… di ba…”
Naghiyawan at pumalakpak ang mga tao sa audience.
Pinapurihan ni Joey ang kanilang scholars na tinotoo raw ang kanilang pahayag nang igawad sa kanila ang EBEST scholarships noon.
“Galing, galing. Proud kami sa inyo,” sabi ni Vic sa kanilang scholars.
Sundot pa ni Vic: “Tapos gaganunin mo lang, no?”
Sabay na natawa sina Vic at Joey.
“Alam niyo na yon,” ngiti ni Vic na nagbato ng makahulugang tingin sa camera.
“Sinulsulan pa!” tawa ni Joey sa sinabi ni Vic.
At saka na nag-proceed si Vic sa next portion ng segment.
Hindi naman nakaligtas sa mapagmasid na viewers ang mga pahaging na ito ng dalawang original Eat Bulaga! hosts.
NETIZENS REACT
Para sa ilang netizens, patutsada ang ginawa nina Vic at Joey sa pamunuan ng TAPE Inc.
“Cryptic message by Joey and Bossing,” comment ng isang netizen.
Inulit ng isang netizen ang sinabi ni Vic: “daming natutulungan ng EB tapos gaganun nyo! Whahaha Bossing!”
“Parang may tinitira [si] Bossing sa sinabi nya @31.56,” hayag naman ng isa pa.
Sunud-sunod din ang puna ng supporters sa pamunuan ng TAPE Inc., na magkatuwang na itinayo nina Romeo Jalosjos at Tony Tuviera.
Si Jaloslos ang may mas malaking share sa TAPE, Inc., pero si Tuviera ang nag-manage ng TAPE Inc. at Eat Bulaga! sa mahabang panahon.
Iniulat sa Cabinet Files na inilipat na ang pamamahala sa TAPE Inc. sa tatlong anak ni Jalosjos: sina incumbent Dapitan City Mayor Seth Frederick “Bullet” Jalosjos, Zamboanga Del Norte 1st District House Representative Romeo "Jon-jon" Jalosjos, Jr., at Soraya Jalosjos.
Diumano, ang mga anak ni Jaloslos na ang magti-takeover ng Eat Bulaga!.
Balitang nakipag-usap na ang mga anak ni Jalosjos sa GMA Network, kung saan may block time ang noontime show.
Kinumpirma naman ni Bullet na magkakaroon ng rebranding ang noontime show at inaasahan ang relaunching ng show sa darating na April 17, 2023.