Hinding-hindi raw malilimutan ni Wilbert Ross nang pagalitan at pagsabihan siya ng batikang direktor na si Joel Lamangan sa isang pelikula.
Inamin ni Wilbert na natakot at nanginig siya matapos siyang sermunan ni Direk Joel dahil hindi mai-deliver nang tama ni Wilbert ang kanyang lines.
Paliwanag naman ni Wilbert, iyon ang first-ever scene niya sa pag-arte kaya nahirapan siyang magbato ng linya.
“Nakakahiya pa magka-eksena pa kami ni Zsa Zsa Padilla—ni Tita Zsa Zsa.
“Yung eksena, bi-video-han ko siya habang nagluluto," kuwento ni Wilbert sa PEP Live interview nitong March 21, 2023.
Ang linya raw ni Wilbert, “So parang, ‘Wow, Mama, ano yan?’ Parang tinatanong ko siya. ‘Ano niluluto mo?’
“Kasi, siyempre, first scene ko talaga ever, so talagang yung nginig ko…”
Gumanap bilang mag-ina sina Zsa Zsa at Wilbert sa 2017 comedy film na Bes and the Beshies na pinagbidahan din nina Carmi Martin, Beauty Gonzalez, at Ai-Ai delas Alas.
Sa unang take, nagkamali raw si Wilbert kaya sumigaw si Direk Joel.
“Sabi ni Direk Joel Lamangan, ‘Cut! Sabihan mo yung bata [Wilbert] energy, energy!’”
Naulit daw ang pagkakamali ni Wilbert sa second take.
Sumigaw raw si Direk Joel na, “’Ano ba yan?! Energy! Aga-aga!’”
Nakaramdam daw ng hiya si Wilbert kay Zsa Zsa dahil nauulit ang take ng eksena.
Sabi ni Wilbert, “Nakakahiya. Si Tita Zsa Zsa parang, ‘Okay lang yan, relax ka lang. Anuhin mo lang, gawin mo lang lakasan mo lang boses mo,’ gumaganon-ganon siya.
“Siyempre, nahihiya ako kasi si Tita Zsa Zsa, di ba, dahil sa akin paulit-ulit siya.”
Muling nagkamali si Wilbert sa third take.
“So after nung pangatlo, ‘Ano ba yan!’” pagpapatuloy ni Wilbert sa reaksiyon ni Direk Joel.
“Nakita ko na si Direk Joel, naglalakad na [papalapit]. Oh my God, grabe. Takot na takot ako.
Sabi raw sa kanya ni Direk Joel na pasigaw, “Ano ba yan?! Wala ka bang agahan, ha?! Gusto mong patakbuhin kita diyan sa kanto, paikut-ikutin kita diyan para magka-energy ka?!”
FREE WORKSHOP FROM DIREK JOEL
Nag-sorry raw si Wilbert sa direktor.
Kasunod daw nito ay binigyan siya ng on-the-spot workshop ni Direk Joel.
Sabi raw nito kay Wilbert, “’Hawakan mo tong towel, hawak!’”
Kuwento ng Hashtags member, “Parang ginawa namin, as in parang nakalibre pa ako ng workshop sa kanya.
“Parang nagta-tug of war kami para mapuwersa ko yung boses ko.”
Habang nagta-tug of war sila sa towel, sinabihan siya ng direktor na, ‘Say your lines!”
“Kaya nailalabas ko talaga yung mismong energy so… grabe,” pagbabalik-tanaw ni Wilbert.
Natuto raw talaga siya sa karanasang iyon.
“Magandang memory talaga siya sa akin. Sobrang honored ko na si Direk Joel pa yung pinakaunang scene ko talaga na tinuruan pa talaga niya ako.”
More hot stories on PEP.ph:
- Meet Eat Bulaga! owner Romeo Jalosjos: The power that can shake up Philippine TV
- Paolo Ballesteros, pumayag kunan ng nude photo ni Ryan Agoncillo
- Lotlot de Leon recalls journey to finding American biological father
- Paul Salas on ex-girlfriend Barbie Imperial: “Ngayon lang po nawala yung pagiging bitter ko sa kanya.”