Ibinahagi ni Piolo Pascual, 46, ang isang personal na pangyayari sa kanyang buhay.
Pag-amin ng ABS-CBN actor, sa rurok ng kanyang tagumpay ay doon niya rin naramdamang “empty” at “walang meaning yung buhay."
Sunud-sunod noon ang acting awards na natanggap ni Piolo para sa pelikulang Dekada ’70 (2002). Ito yung mga panahon na nasa tugatog ng kanyang kasikatan ang aktor sa pelikula at TV.
Lahad niya sa vlog ni Amy Austria noong April 24, 2023: “I remember vividly in my room, sabi ko, ‘Ito yung pinapanood ko lang nung bata ako. Yung mga awards night.’
“Ang gaganda ng mga trophy and I won all of them. Nakikita ko po yun sa kuwarto ko na mag-isa.
“After the party, after the celebration, I remember holding one trophy, sabi ko, ‘Ito na ba yon? Ito na ba yung pinagtrabahuan ko?' Parang, ‘How come I feel so empty? How come parang walang value?’
“And that’s when I started questioning. That’s when I asked the Lord.
“Sabi ko, ‘Ano ba yung meaning ng ginagawa ko? Why am I here? What is my purpose?’”
FINDING HIS PURPOSE
Taong 2002 din nang gawin niya ang pelikulang 9 Mornings katambal si Donita Rose.
Niregaluhan ni Donita si Piolo ng isang Bibliya para sa birthday ng aktor.
“Yun po yung parang naging sign for me to look for something I didn’t know yet,” sabi ni Piolo.
Noong sumunod na taon, 2003, ginawa ni Piolo ang ABS-CBN teleserye Sa Puso Ko Iingatan Ka katambal si Judy Ann Santos.
Nakatrabaho rin noon ni Piolo si Coney Reyes, na nangulit daw sa kanyang sumama dumalo sa church.
Iyon daw ang panahong sumali si Piolo sa Victory, isang Christian fellowship.
“I surrendered my life to the Lord,” sabi ni Piolo.
Doon daw niya natutunan ang purpose ng Bible—ang maging guide sa pang-araw-araw na pamumuhay.
Bukod sa pagbabasa ng Bibliya ay dumadalo si Piolo ng discipleship.
Unti-unti ay nadidiskubre raw ni Piolo ang kanyang “purpose.”
“Ah, kaya ka pala gusto kong mag-artista, kaya ka pala gusto ko tong gawin, to find purpose and meaning to my life,” sabi ng aktor.
Sa pagiging bahagi ng entertainment industry, hindi lamang nakakapag-entertain si Piolo kundi para maging mabuting halimbawa sa iba.
A LIFE WITH PURPOSE
Napunan daw ang anumang kulang sa puso ni Piolo sa pagpasok sa Christian fellowship.
“When I surrendered my life to the Lord, I was at the peak. And that’s when I felt most empty.
“Yung irony lang po nun, na akala mo you’re the king of the world and yet inside you, there’s void in my heart.
“Don ko na-realize na ito ang purpose ng buhay: to serve the Lord and do His will and follow His purpose to your life.”
Nahanap na raw ni Piolo ang kapayapaan sa kanyang puso.
“When I became a Christian, I had more peace knowing no matter what happens, the Lord got me.
“Kumbaga, nagkaroon ako ng zest. I found more meaning to what I was doing...
“When I surrendered my life to the Lord, that’s when I found peace and I never looked back.”
Sa ngayon ay aktibo si Piolo sa kanilang church, tulad ng weekly Bible study, at patuloy na pinagyayaman ang kanyang spiritual life.