Maligayang-maligaya si Patricia Javier dahil ang kanyang anak na si Robert Douglas Walcher IV ang nagwaging Mister Teen International 2023.
Ginanap ang pageant sa TOT Academy, Bangkok, Thailand, nitong Huwebes ng gabi, June 1, 2023.
Hindi lamang ang Mister Teen International 2023 title ang napanalunan ni Robert dahil siya rin ang tumanggap ng mga special award na Best in Smile, Most Charming Male, Sash Factor’s Male Choice, at Mr. Popular.
Ang Mister Teen International ay isa lamang sa apat na titulong ipinamahagi sa naganap na beauty pageant. Ang tatlo pa ay ang Miss Teen International, Mister Pre Teen International, at Miss Pre Teen International.
“My husband [Dr. Rob] and me are proud parents because this is the first ever pageant of our son,” pahayag ni Patricia sa Philippine Entertainment Portal (PEP.ph) ilang minuto matapos maganap ang koronasyon.
Nakadagdag sa kaligayahang nararamdaman ni Patricia ang katuparan ng kanyang pahayag sa PEP.ph bago sila lumipad ni Robert sa Bangkok noong Linggo, May 28.
“I also believe that God will use my son to be a good role model for the youth and represent our country with pride!” pahayag ni Patricia na nagkatotoo dahil sa tagumpay ng kanyang anak.
Robert with his mom Patricia Javier and grandmother Jeanette Canlapan, who are also both titleholders
Kung hindi nanalo si Robert, babalik na dapat sila ni Patricia sa Pilipinas sa June 3. Pero madaragdagan pa ang araw ng pananatili nila sa Bangkok para sa kanyang mga tungkulin bilang Mister Teen International 2023.
Hindi sumama sa Bangkok ang tatay ni Robert dahil nag-alala sila ni Patricia na baka lalong kabahan ang kanilang anak kapag nanood ito.
Mental health awareness ang adbokasiya ni Robert, na tuwang-tuwa dahil tagumpay ang kanyang unang paglahok sa isang international pageant at higit sa lahat, nakapagbigay siya ng karangalan sa Pilipinas.