Si Dolly de Leon ang unang Pinay actress na naimbitahang maging member ng Actors branch ng Academy of Motion Pictures and Arts Sciences (AMPAS). Ang nasabing organization ang namamahagi ng taunang Academy Awards o Oscars.
“Ang impact nun sa akin, I feel that we are empowered,” pahayag ni Dolly sa mediacon ng Cinemalaya XIX noong Hulyo 5, 2023, Miyerkules, sa Philippine International Convention Center (PICC), Pasay City.
“Hindi lang ako, pero tayong mga Pinoy. Na finally, meron na tayong boses. Maririnig tayo.
“Meron tayong kumbaga the right to vote. Ang laking karangalan nun, yung makaboto ka.
“Nung unang taon na puwede nang bumoto ang babae sa mundo, di ba, ang laking bagay nun.
“So ngayon, may boto na ang Pilipino diyan sa Actors Branch.”
Noong Hunyo 2017 ay napabalita na kabilang sina Direk Lav Diaz at Direk Brillante Mendoza sa 774 na naimbitahan noong taong iyon para maging member ng AMPAS.
Read: Brillante Mendoza, Lav Diaz make history as first Pinoy members of Academy
THE INVITATION
Kailan at paano nalaman ni Dolly ang paanyaya upang siya ay maging miyembro ng AMPAS?
“Email. In-email nila ako. Tapos kinunan ko ng screenshot. Tapos finorward ko sa management team ko sa States,” pagtatapat ni Dolly.
“Sabi ko, ‘Is this a scam?’ Kasi, di ba, pag sa email, andaming nagpapadala na mga scammer? Ha! Ha! Ha!
“Sabi nila, ‘No! It’s confirmed. You’ve been invited.’”
Hindi pa iyon nababalita noon?
“Wala pa sa balita nun. Sa email ko lang natanggap. And then, sabi nila, ‘No! It’s confirmed.’
“So tinanong ko, ‘What’s the benefit of being a member?’ Sabi nila, it’s prestigious.
“Prestige, and you have the right to vote not just in the Actors branch pero for officers, whenever they vote for governors and all that.
“So meron na tayong boses ngayon dun. Pero yun nga lang, hindi siya libre, ha, para maging member. May annual fee siya.
“So sabi ko, ‘Is it worth ba na gagastusan ko ito?’ Sabi nila, ‘Yes, it is!’”
Read: Dolly de Leon fully booked with international and local projects this 2023
NINE PERFECT STRANGERS
Nakatakdang lumipad si Dolly pa-Germany sa Agosto 28 para sa six-month shooting doon ng nine episodes ng Season 2 ng TV drama series na Nine Perfect Strangers.
Streaming sa Prime Video ang serye, kung saan bida si Nicole Kidman bilang Masha Dmitrichenko na founder ng wellness resort na Tranquillum House.
Nasa cast din niyon sina Liv Ullmann, Murray Bartlett, Maisie Richardson Sellers, at Aras Aydin.
“Magsu-shoot kami sa Germany, sa Munich. Kasi, dun ang location, sa alps, pero it’s an American production,” salaysay ni Dolly.
“Magiging close yung characters namin ni Murray Bartlett sa story. Sobra-sobrang excited ako!”
Uuwi si Dolly sa bansa sa Disyembre para dito mag-Christmas at New Year, tapos ay babalik din siya sa Germany. Ready na siyang mapalayo nang matagal sa pamilya at mga kaibigan?
“Inihanda ko na ang sarili ko tsaka parang tanggap ko na yan na mangyayari at mangyayari yan na mawawala ako sa bahay nang matagal,” saad ni Dolly.
“E, masuwerte lang tayo nowadays, may technology na, na puwede nang mag-Facetime.”
Wala siyang +1 pagpunta sa Germany?
“Puwedeng magdala ng +1 pero complicated, e. So, ako na lang mag-isa.”
After ng six-month shooting ng Nine Perfect Strangers ay may gagawin nang Hollywood film si Dolly, pero hindi niya pa puwedeng i-announce kung ano iyon.
Read: Dolly de Leon "so proud to be the first Filipina" nominated for Best Supporting Actress at BAFTA
CINAMALAYA XIX
Suporta si Dolly sa dalawang full-length films ng Cinemalaya XIX: Iluminasyon — Iti Mapukpukaw (The Missing) ni Carl Joseph E. Papa, at Ang Duyan ng Magiting (The Cradle of the Brave) ni Dustin Celestino.
Animated film ang Iti Mapukpukaw, kung saan bida sina Carlo Aquino at Gio Gahol.
Nasa cast din ng Ang Duyan ng Magiting sina Bituin Escalante, Agot Isidro, Miggy Jimenez, Jojit Lorenzo, Frances Makil-Ignacio, Joel Saracho, at Dylan Ray Talon.
“Sampu ang pelikula, panoorin po natin lahat. Suportahan natin ang pelikulang Pilipino… Magaganda lahat ng selections this year,” pahayag ni Dolly.
Under renovation ang Cultural Center of the Philippines (CCP), kaya sa PICC gaganapin ang Cinemalaya XIX: Iluminasyon sa Agosto 4-13.
Ipapalabas ang Cinemalaya films sa tatlong meeting rooms — Cinema Rizal (Meeting Room 1), Cinema Bonifacio (Meeting Room 2 and 3), at Cinema Felipe (Meeting Room 4). Ang fringe events at talkbacks ay gaganapin sa Cinema Palma (Meeting Room 5). Ang exhibitions at filmmakers’ profiles ay idi-display sa Executive Lounge.
Read: Dolly de Leon hails Kathryn Bernardo as "young Nora Aunor"