Espesyal ang araw na ito dahil ngayong alas siyete ng umaga ang graduation ni Aiko Melendez sa kolehiyo!
"Bukas graduate na ako!
"Finally!!! With diploma na ako," ang umpisang pahayag sa amin ni Aiko via Facebook messenger kahapon, July 28, 2023.
Nagtapos si Aiko sa Philippine Women's University ng kursong Communication Arts Major in Journalism.
Ginanap ang graduation ni Aiko sa PICC (Philippine International Convention Center) sa Roxas Boulevard ngayong araw, July 29.
Ekslusibong kuwento pa ni Aiko sa PEP.ph (Philippine Entertainment Portal), "Last year before campaign, nag-start ako [mag-aral muli], kasi nag-college ako dati sa St Joseph’s College pero hindi ko natapos sa sobrang busy.
"Mass Commmunications ako, 'tapos nag-shift ako sa BS Psychology. So na-accredit naman some of my subjects before."
Aiko fulfills promise
Kaya sa kabila ng busy schedule ni Aiko sa pulitika at pag-aartista ay pinilit niyang makatapos ng kolehiyo.
"Yan ang naipangako ko sa Daddy Danny ko bago pa siya nawala, na tatapusin ko ang studies ko by hook or by crook.
"And sa mom ko din," pagtukoy ni Aiko sa stepfather niya na si Danny Castañeda (na namayapa noong Pebrero 2021 sa U.S. dahil sa Covid-19) at ina ni Aiko na si Mommy Elsie Blardony.
"Ang kaso, di ba, showbiz was my bread and butter? So now I have two kids na both nag- excel sa studies nila, I have to finish mine, too.
"So nung pandemic nagkaroon mg ETEEAP course online, blended, nag-enroll ako."
Ang ETEEAP ay ang Expanded Tertiary Education Equivalency and Accreditation Program.
Sa ilalim ng programang ito ng CHED (Commission on Higher Education) at ilang piling unibersidad, ike-credit sa requirements para magkaroon ng degree ang mga kaalaman, skills, experience, at achievements ng nagtatrabaho nang estudyante para madali itong maka-graduate.
"Online at face-to -face course siya with diploma. So now tapos ko na siya," sabi ni Aiko.
"I think best gift ko ito sa mga anak ko and to also inspire busy working moms like me to finish my course."
what's next after graduation
Para kay Aiko, hindi hadlang ang edad upang makapagtapos ng pag-aaral ang kahit na sino.
"Not naman base sa age ang education, it's universal kaya tinapos ko.
"After nito, magma-masteral na ako. Mag-rest lang ako this semester 'tapos enroll uli."
Sa tanong namin kung bonggang gown ba ang isusuot niya ngayong araw na ito sa kanyang pagtatapos...
"Hindi, simple dress pero by Edwin Tan."
Nakatoga raw siya sa ibabaw ng kanyang dress.
View this post on Instagram
Samantala, doble ang selebrasyon nina Aiko dahil bukod sa kanyang college graduation, kahapon naman ay 17th birthday ng unica hija niyang si Marthena Jickain.