Hindi lang isang beses narinig ang sigaw na “sulit ang ticket!” sa Queendom: Live concert kagabi, December 2, 2023 sa Newport Performing Arts Theater.
Para sa isang performer, ang ganitong klaseng reaction o comment mula sa audience ay maituturing na musika sa kanilang pandinig.
Hindi binigo ng mga Queens ng Kapuso network pagdating sa kantahan at biritan ang mga nanood ng kanilang kauna-unahang concert, na hanggang ngayon ay pinag-uusapan pa rin sa social media.
Maituturing na isang tagumpay ang kauna-unahang concert ng anim na Queens na sina Rita Daniela, Thea Astley, Jessica Villarubin, Marianne Osabel, Hannah Prescillas at Julie Anne San Jose.
Deserve nila ang standing ovation na ibinigay sa kanila ng mga manonood dahil sa flawless performance nila ng kanilang repertoire.
Sinimulan nila ang concert sa mga kantang “Run the World,” “Power,” “Respect,” “Burnin Up.” Kasunod ang Adele Medley na pinalakpakan ng husto mula sa “Hello,” “Chasing Pavements,” “All I Ask,” “Someone Like You,” at “Easy on Me.”
Kahit ang choreography, blocking ng bawat production number ay tama ang timpla. Maging ang pagpasok ng solo spot ng bawat isa ay hindi pilit.
Kung isa ka sa audience, imposibleng hindi mo aabangan ang magiging pasabog ng mga Queens sa kanilang solo spot — matatalbugan ba ang sinundan nilang performer o mas bibirit nang todo?
Pero ang maganda sa Queendom: Live, walang sapawan na naganap. Equally distributed din ang spot ng bawat isa at lahat sila ay may kanya-kanyang moment.
Given na si Julie ang pinakasikat sa anim, hindi niya ito ipinaramdam sa mga kasama at hindi rin ito mararamdaman ng mga manonood. Balanse silang lahat, may suportahan at harmony ang boses at galaw ng bawat isa.
Ang husay ni Rita sa kanyang “I Am Changing.” Tumanggap ng standing ovation si Mariane kanyang solo spot na “Bridge Over Troubled Water.” At nag-shine rin si Thea sa kanyang “Purple Rain” ni Jessie J. Ipinamalas nina Hannah sa kanyang “What Kind of Fool Am I?” at ni Jessica sa kantang “Where Do I Begin?” ang vocal prowess nila.
Ang linis din ng version ni Julie Anne San Jose ng “Papa Can You Hear Me?” ni Barbra Streisand.
Naging special guest ang mga Kapuso na sina Jeremiah, John Rex at Rayver na humataw ng Bruno Mars medley. Napa-throwback pa si Rayver dahil last year raw of almost the same time, ang concert din nila ni Julie.
Nag-perform din si Garrett Bolden sa Majesty prod number. Tila tribute to Gloc-9 ang performance ng anim sa mga hit songs nito. At personal favorite namin sa kabuuan ng Queendom Live concert ang acapella number nila na “End of the Road,” at “Man in the Mirror.”
Hindi naman nakalimutan ng Queens na hindi pasalamatan ang kanilang mga bosses sa GMA-7 at Sparkle, lalo na si Atty. Felipe L. Gozon.
Suportado naman sila ng mga kapwa Kapuso stars tulad ng mga Sparkle boys, Ken Chan, Kyline Alcantara, Zephanie, Ysabel Ortega at Miguel Tanfelix. Gayundin si Kris Bernal at ang bagong boy group ng Star Music na 1621BC.
Sa pamamagitan ng Queendom: Live, ipinakita nga nina Rita, Hannah, Jessica, Mariane, Thea at Julie kung bakit karapat-dapat silang tawaging ‘Queens’ pagdating sa biritan at kantahan.
Nagsimula sa All-Out Sundays ang Queendom, pero base sa naging performance nila sa Queendom: Live, sana ay maiikot ito hindi lamang sa iba pang parte ng Pilipinas kung hindi makilala pa ang anim sa iba’t ibang bansa.